Hemserekê Şaredarîya Bajarê Girdî yê Amedî Serra Bucak û Dogan Hatun, pîrozkerdişê şar û temsîlkarê dezgeyanê sîvîlan qebul kerdî.

Hemserekê Şaredarîya Bajarê Girdî yê Amedî Serra Bucak û Dogan Hatun, pîrozîye şar û dezgeyanê sîvîlan qebul kenî. Hemserekî ewro zî program de şarî reyde selahîyetdaranê sey dezgeyanê Odeya Bazirganî û Sanayî ya Dîyarbekirî(DTSO) û Komela Qayitkerdişê Koçî(GOÇDER) qebul kerdî.

Bucak: Ma do pîya bixebitîn

 Hemsereke Serra Bucak, salona kombîyayişê meclîsî de qebulkerdişê Serekê DTSO Mehmet Kaya û endamê rêveberîyî di qalîkerdişêk viraşt û da zanayene ke bêrê şaredarî herkesî rê akerde yo,”Ewro tîya têhetamayişê şima ver ma keyfweşî. Ma vizer meclîse akerd. No meclis 8 serrî yo padîyabi. Tîya de îradeyê şarî, meclîsê bajarî yo sîstemê demokratik û beşdarvan çînebi. Encamê ferasetê tekparêz ma heme Dîyarbekirijan dî. Nika ma sere proseseke de yî. Nika ma do yew bi yew semedê çareserkerdişê nê texrîbatan, semedê ronayişê ferasete komelvan û beşdarvan bixebitîn. No bajar wayîrê dezgeyê sîvîlî yê zaf girîng o. No qepsam de ma do xebata pîya xebitîyayişî û averberdişî esas bigerê. Zîyaretê şima semedê ma zaf girîng ê” vat.

Hatun: Meclis de teberê şarî do bire mevejîno

Hemserek Dogan Hatun, Serekê DTSO Û endamê rêveberî rê zîyaretê înan ver spas kerd û da zanayene ke meclis de tebere şarî do bire mevejîno. Hatun bal ont ke meclis şarî reyde cayê çareserkerdişê probleman o.

Kaya: Şaredarî padîya şarî

Serekê DTSO Mehmet Kaya, da zanayene ke şaredarî padîya şar, dezgeyanê sîvîl û karmendan û ard ziwanê xo ser ke bajarê 2 mîlyonin bi mezgê tekparêzî ame îdarekerdiş. Kaya caardişê qeyuman rexne kerd û :”Şima meclîse akerd, îradeyê şarî tîya de yî. Ma bawer î ke şima teyna bi akerdişê meclîse nêy, heme bêrê şaredarî akerê dezgeyanê sîvîl, karmend û şarî” vat.

Sereka Meclîsê Karmende Cinîyan Nevîn Îl zî da zanayene ke akerdişê meclîsê şaredarî teyna semedê Dîyarbekirî nêy semedê şarî zî girîng o û semedê heme game averberdişê şaristanî de ê kişta şaredarî de bê.

Hemserekî Bucak û Hatun pîrozkerdişê dezgeyanê sîvîl û şarî qebul kerdî û Înan reyde suhbet kerdî. Temsîlkarê dezgeyanê sîvîlan û hemwelatîyan zî hemserekî pîroz kerd û xebatanê înan de serkewtişî waşt.