Festîvalê Şanoyî yê Amedî ya 9ine, ke bi piştgirîya Şaredarîya Bajarê Girdî ya Amedî virazîyeno, merasîmê Konaxa Îskenderpaşayî de dest pê kerd.
Destpêkê Festîvalê Şanoyî yê Amedî yo 9ine, ke bi piştgirîya Serekîya Dayîreyê Karanê Kultur û Sosyalî tertîp beno, qezaya Sûrî Konaxa Îskenderpaşayî de dîya destpêkerdiş.Merasîm rê Hemserekê Şaredarîya Bajarê Girdî yê Amedî Serra Bucak û Dogan Hatun, Hemsereka Şaredarîya Bajarê Girdî ya Mêrdînî Devrîm Demır, temsîlkarê dezgeyanê sîvîlan û şanogeran beşdar bîyî.
Bucak: Ma soz dayê ke bajarê xo bikerîn bajarê kultur û senetî
Hemsereka Şaredarîya Amedî Serra Bucak akerdişê festivale şanoyî de qalîkerdişêk viraşt û vîr vist ke ewro semedê Festîvalê Şanoyê ya Amedî ya 9ine ameyî têhet û heme şanogerê herêmî û kedkarê şanoyî yê rojawanê Tirkîya de vengê Şanoyê Kirdî yê rê spas kerd. Bucak da zanayene ke xebatanê weçînîtişê herêmî ra dima, badê 1ê Nîsane îradeyê şarî newera şareadrîyan de wayîrê qese yo û Bucak qalîkerdişê xo wina domna:”Festîvalê şanoyî ke rastê no deme ame rê ma zî Konaxa Îskenderpaşayî de tira şahîdÎ kenî. Heme embazanê kedwerê rê spas. Semedê heme şanohesan hewteyek xeylê şano estê. Xeylê welatan ra zî beşdarî estê. Şanoyê Armenîkî û Kurdî bêrê kaykerdene. Ez heme şanohesan rê temaşekerdişêko weş wazena. Ez hevî kena ke Amed de herkes hewteyêke bişano bicuwê. Bi wesîleya ci zî herkes dest bi hewayê kultur û senetî ya ke ma zaf birî kerdbi, bikerîn. Ma soz dayê ma do no hamnanî Amedî bikerî bajarê kultur û senetî. Ma soza xo tîya de reyna vanê. Reyna nê prosesê xidar de hemverê heme zext û padîyeyan kesê ke sey kirarê tîyatroyê Kurdî selam kena,wa şanoyê kurdî biciwo.”
Hatun: Kultur û şanoyê ma ame astengkerdene
Hemserekê Şaredarîya Amedî Dogan Hatun zî da zanayene ke, gama sifte ya soza ke demê weçînîtişî de dîyayî, erzîya û “Se ke qayum ame ziwan, kultur û şanoyê ma asteng kerd. Heta waştêne ke kultur de qirkerdîşêko pÎl bivirazê la xêzê înan besê nêkerd. Çimkî kultur û senetê ma qirkerdişê Înan r apilêr bi. Welew serra 1999 de ke ma reya sifte şaredarîyan girewtbi xebatanê en pîl warê kultur û senetî de bi. O wext bajarê ma seranser senet, edebîyat, şano, festîval, stran û deyran bi. O wext şarê ma zaf piştgirî dayebi. Ê lebate kerd ke no bajarê senet û hunerî bidizê. No şare bi henzar serreyan bi ziwan, kultur, edebiyat û senetî ciwîyayo. Wa festîval heme şare ma rê xeyrîn bo”vat.
Festîval bi skeçê progremê destpêkî yê şanogeran qedîya.
Kayê ke festîval de bêrê kaykerdene
Qepsema festivale de kişta şanoyan xeylê xoşeber zî bêrê viraştene.Festîval do heta 27ê Nîsane dewam bikero û kayanê Buka Lekî (Şermola Performans), Afet ile Diana (BGST), Salma (Koma Hawar), Derwêş yan Gudû (Duhok), Efsaneya Hespên Azad (Urmiye), Kabil û Habîl (Koma Ritiûel), Odip (Koma Ronya-Seqiz), Kral û Travîs (ŞanoAr), Çînur (Teatra Ba), Zîd û Han (Dubare Kumpanya), Mirina Jeanne D’arce ya din (Şanoya Bajarê Amed), Ceyran (Teatroger), Strip-Tease (Dimilki- Şanoya Bajarê Amed), Kalabalık Tiyatrosu (Fiziksel Tiyatro Araştırmaları), Bernarda (Tiyatro Proje No2), İnfaz (Şaneşin Performans), Otopsi (Gölge Tiyatro Topluluğu), Gomidas (Yolcu Tiyatro) û Rîuelîstîk Playroots temaşekerdoxan reyde bêrê têhet.
Kayê şanoyî, Merkezê Kulturî yê Çand Amed(Merkezê Kultur û Kongreyî) Şanoyê Şaristanê Amedî û cayanê tarîxî yê bajarî de bêrê peşkeşkerdene.