Şaredarîya Şaristanê Girdî tê Amedî, Mêmanxaneyê Merdimanê Nêweşan de 45 rojan de 9 hezar û 250 kesî kerdî mêman. Mêmanxane de xîzmetê revîr, arayî û şamî pêro bêpere yenê dayene.

Mêmanxaneyo ke faalîyetanê xo bi nameyê Daîreya Xîzmetê Sosyalan keno, 136 oda  û 391 cile ra yeno meydan û Tirkîya de nê warî de Mêmanxaneyo tewr pîl o. Nêweşê ke bajaranê cîranan ra yenê û cayê înan çin o, eşkenê bêpere nê mêmanxaneyî de bimanê. 45 rojan de 9 hezar û 250 kesî bîyî mêman.

Mêmanxane de mêmanî konfirîya otele de xîzmetanê revîr, arayî, mescîd, şamî, wîfî û odaya cilşutiş û utukerdişî ra bêpere îstîfade kenê.

‘Heme xîzmetî bêpere yê’

Serekê Serekîya Daîreya Xîzmetanê Sosyalan Serkan Demîrkanî derheqê mêmanxaneyî de qisey kerd  û îzah kerd ke heme xîzmetî bêpere yenê dayene, Demîrkanî wina dewam kerd: “Ma mêmanê xo rê ke teberê bajarî ra yenê, bi konforîya otele de xîzmet danê û heme xîzmetê ma zî bêpere yê. Mêmanê ma hertim memnun benê. Ma cehd kenê ke ê xo sey keyeyê xo de hîs bikê.”

‘Ma do îmkanê servîse zî bidê’

Demirkanî dîyar kerd ke ê wazênê hîna weş xîzmet bidê û wina va: “Demanê ameyoxî de ma do xîzmetê servîse zî dekerê dewre. Ma sey Şaredarîya Şaristanê Girdî yê Amedî destê ma ra çi bêro, ma do bikê.”

‘Xebatkarî sey lajê min ê’

Fatma Bagdû ke mêmanxaneyî de lajê xo reyde manena, aye dîyar kerd ke xîzmetê xebatkaran ra zaf memnun bîyî û nê çîyî vatî: “Ma Silopîya ra ameyî tîya ke tedawî bigîrê. Cayê ma zaf rehet o. Heme çî pak û weş o. Ma zaf memnun ê. Homa înan ra razî bibo ke ma rê nê îmkanan danê. Ma sey keyeyê xo tîya de rehet ê. Xebatkarî ma reyde zaf eleqedar ê, ê heme sey lajê min ê. Homa înan ra zî razî bibo.”

‘Otela tewr erjane 1000 TL ya, tîya bêpere yo’

Fatma Tûsa ya ke Idîr ra seba nêweşîya xo ameya Amed, dîyar kerd ke ê aşmêko ke mêmanxane de manenê û Tûsa nê çîyî vatî: “Tîya de ma arayî şamî wenê. Her kes zaf eleqedar beno. Seke ma keyeyê xo bibê. Heme ca zaf pak o. Homa xebatkaran ra razî bibo.” Refakatkar Serkat Tûsayî zî ard ziwan ke ê mêmanxaneyî de bêpere manenê û bi saya nê xîzmetî barêko zaf giranî ra xelisîyayî.

Tûsayî wina dewam kerd: “Verê, ez çar rojî otele de menda otela tewr erjane nika 1000 TL ya. Homa înan ra razî bibo ke tîya viraşto. Tesîsêko winayên rasta zî zaf rind o. Seba ma nêweş û merdimanê nêweşan çîyêko zaf biavantaj o. Ewro teber ra cemêk wer tewr kêmî 300-400 TL yo. Tîya de ma hemînan bêpere gênê. Seba ma noz af rind o.”

‘Tîya sey keyeyê min o’

Esra Karagola ke sena nêweşîya xo Xarpêt ra ameya, wina va: “Ez ameya Amed de linga xo ra tedavî biba. 20 rojî yo ke ez tîya de ya. Tîya sey keyeyê min o. Ez seke keyeyê xo de biba, rehet rakewena, awkî, kincxane û werdxaneyê ma est o. Werê ma zaf weş û pak o. Heme xebatkarî zaf baş ê. Ez şima hemînan rê sipas kena.”