Şaredarîya Amedî ya Şaristanê Girdî seba turîstê ke yenê Amed, ê Amedî weş bişinasnê û tira keyf bigîrê, turîstan rê xîzmetê rehberîye û zabitayîye dana.

Şaredarîya Amedî ya Şaristanê Girdî seba turîstanê herêmî û xerîban Qezaya Sûrî de xeylê cayan de seba memnunîya turîstan xebitêna û Amedî dana şinasnayene. Şaredarî cehd kena ke Amed bireso daraxê xo yê turîstîye.

Herêma Sûrîçî de 3 buroyê turîzmî

Buroyê Turîzmê ke bi nameyê Serekîya Daîreya Kultur û Karê Sosyalî xebitênê, 3 cayan de xîzmetê turîstan kenê. Cayê buroyan wina yo; Raşteyê Berê Koyî, Berê Mardînî û Keyeyê Dendbêjan. Buroyê turîzmî turîstan rê Amedî danê şinasnayene û meteryalê amedî dîyarî kenê ke.

Ekîbê Zabitayî yê Turîzmî Xîzmetê Turîstan de yê

Ekîbê zabitayî yê Şaredarîya Amedî ya Şaristanê Girdî herême Îçkale de  seba ke turîstî bi hewayêko ewle bigêrê, bêmabên xebatanê xod ewam kenê.

7 ziwanan de xîzmetê daşinsnayîşî

Ekîbê zabita yê şaredarîye turîstan rê xîzmetê rehberîye zî danê. Bi îngîlîzkî, almankî rûskî, îspanyolkî, tirkî, zazakî, û kurmancî 7 ziwanan de xîzmetê şarê xo kenê. Serekê Daîreya Zabitayî Veysî Ruzgarî wina va: “Yewîneyê ma yê zabitayî cîya-cîya yê. Cayo ke ma tede yê seba ke cayêko turîstîk o, ma ekîbê xo yê ke turîzmî ekeqedar ê, tîya de bi ca kerdî. Embazê ma turîstan rê xîzmetê daşinasnayîşî danê.”

Esnafê Sûrîçî rê melumat ameyî dayene

Endamê meclîse yê şaredarî, Sereka Daîreya Esnaf û Seneetkaran Berîvan Guneş û ekîbê Şaredarîya Sûrî esnafî zîyaret kerdî û înan rê melumetê turîzmî ameyî dayene ke turîstî bi rehetî dayîş û girewtişê xo bikê.

‘Ma xîzmetî ra memnun ê’

Nesrîn Bayrama ke Îstanbul ra ameya ke cayanê tarîxîyan bivîna; “Ez ameya ke turbeya Hz. Suleymanî bivîna. Ekîbê zabitayan ma çarnayî. Cayê zaf weşî est ê. Ma mîyanê sûran ra pirdê des berî ra gêrayî. Ekîbê zabitayî ma rê melumat dayî. Ma zaf memnun ê.”