Rojê Sînemaya Ewropa yê 4. ke hemkarîya Serekîya Daîreya Kultur, Huner û Karanê Komelkî ya Şaredarîya Amedî ya Şaristanê Girdî û Merkezê Agahîyan ê YE yê DTSO'yî de yenê caardiş, xo hazir kenê ke 16 fîlmanê weçînayeyan ê Ewropa sînemahesanê Amedî reyde bîyarê têhet. Festîvale do 21-25ê teşrîna verêne ya 2026î de Merkezê Kultur û Kongreyî yê Çand Amedî de bêra organîzekerdiş.

Festîvale bi piştîdayîşê Delegasyonê Yewîya Ewropa yê Tirkîya, sefîranê welatanê endaman ê YE, enstîtuyanê kulturî û Merkezanê Agahîyan ê YE yê Tirkîya pêroyî yena organîzekerdiş. Emser Amedî reyde Antalya, Îzmîr, Samsûn û Trabzon de zî do eynî wext de sînemahesan reyde bêra têhet.

Weçînayîşo ke tede fîlmê Awusturya, Belçîka, Danîmarka, Estonya, Fransa, Îrlanda, Îspanya, Îtalya, Letonya, Lîtvanya, Luksembûrg, Holanda, Polonya, Portûgal, Yûnanîstan û Swêdî ca gênê, do cîyayîya kulturî ya Ewropa bi ziwanê sînema biresno temaşekeran. Programî de komedî, dram, belgefîlm û anîmasyonî est ê. Fîlmî temayanê sey keye û têkilîyê merdiman, nasname û vurîyayîş, muzîk û afirnayîş û meseleyanê komelkîyan anê perdeyo sipî.

Akerdişê festîvale do 21ê teşrîna verêne roja çarşemeyî saete 18.00 de Merkezê Kultur û Kongre yê Çand Amedî de bêro kerdiş. Panc rojî sînemahesî do firsend bivînê ke nimûneyanê tewr newe û balkêşan ê sînemaya Ewropa bêpere temaşe bikerê.

Koordînatorê Merkezê Agahîyan ê YE yê DTSO'yî Mehmet Nezîr Guneşî bale ante ci ser o ke sînema mabênê kulturan de warêko xurt ê têkilî yo û vat: “Amed reyna hunerî reyde yeno têhet. Ma do hîkaye, dinya û hîsanê sînemakaranê welatanê cîya-cîyayan ê Ewropa Amed de temaşekeran reyde bîyarê têhet. Ma heme sînemahesan dawetê festîvala xo kenê ke ma bi fehmê ‘hîkayeyê cîyayî, hîsê hemparî’ organîze kenê.”

Mojnayîşan de nê 16 fîlmî do biresê temaşekeran: Glimmers, Heads or Fails, Mr. Nobody Against Putin, My Voice, Gloria!, Loss of Balance, A Boat in the Garden, Flow, Peacock, Tasty, Athens Midnight Radio, Kidnapped!, Nice People, Breathing Underwater, Life & Love û Four Mothers.

Çarnayox: Mehmet Olmez