Mîrasê gastronomî yê Amedî bi keda cinîyan yeno daşinasnayîş
Şaredarîya Amedî ya Şaristanê Girdî Fuarê Gurme û Tehmanê Herêmkîyan ê Mezopotamya de stand akerd. Şaredarîye wazena ke keda cinîyan bêro dîyayîş. Berhemê ke cinîyan bi keda destan viraştî wina resenê hîna zaf kesan.
Fuarê Gurme û Tehmanê Herêmkîyan ê Mezopotamya emser reya 8. Amed de yeno viraştiş. Fuar mabênê 17-22ê teşrîna peyêne de zîyaretkerdoxan qebul keno. Fuar kulturê mitbaxê şaristanî dano şinasnayîş û keda berhemardoxanê cinîyan vejeno vernî.
Standê Serekîya Daîreya Kultur, Huner û Karanê Komelkîyan de materyalê daşinasnayîşî yê şaristanî û berhemê kooperatîf û grûbanê piştîpêdayîşê cinîyan yenê nawitiş. Stand de 7 grûbanê piştîpêdayîşê cinîyan rê cayê rotişî ame dayîş. Serekîya Daîreya Polîtîkayanê Cinîyan zî bi Grûba Berhemardişê Nebatanê Dermanî û Aromatîkan beşdarê fuarî bîye. Na grûbe sirke, melhem, krem, tentur û rûnê nebatî dana şinasnayîş.
Tehmê bi nîşanê cografî yenê daşinasnayîş
Mudirê Şûbeyê Gastronomî û Markabîyayîşî Ercan Alpayî va ke înan 5 atolyeyê cîyayî amade kerdî. Alpayî dîyar kerd ke amancê înan o yo ke werdê Amedî yê bi nîşanê cografî biresê hîna zaf kesan. Tehmê ke atolyeyan de yenê amadekerdiş beşdaranê fuarî rê yenê îkramkerdiş.
Kilîncaya Amedî eleqe dî
19ê teşrîna peyêne de Executive Chef Mesude Onen viraştişê kîlimcaya Amedî bi pratîk mojna. Kilîncayê ke ameyî viraştiş zîyaretkerdoxan rê ameyî îkramkerdiş.
Atolyeyî do dewam bikerê
20ê teşrîna peyêne de mamosta Fatma Kaya do Şîranîya Cimîllî, 21ê teşrîna peyêne de şefa aşpeze Ozdene Tetîk Islanmaz do Şorbaya Kurd Mustafayî amade bikera. Roja peyêne, 22ê teşrîna peyêne de, bi beşdarîya gastronomîst Alaaddîn Kiliçî Atolyeya Tirşa Kuyan a Sifir Eşteyî do bêra viraştiş.
