Çarçewaya xebatan de ke bi hempartîya Serekîya Daîreya Pawitiş û Kontrolê Cugehî ya Şaredarîya Şaristanê Girdî û Şaredarîya Baglarî yenê ramitiş, taxanê Muradîye, Korhat, Yunus Emre, Şêx Şamil û Fatihî de aşma peyêne de 32 banê metrukî ameyî rijnayîş. Goreyê waştişanê ke yenê, do 60 awanîyê bînî zî bêrê rijnayîş. Peynî de rijnayîşê di bananê metrukan ê Kuçeya 979. ya Taxa Yunus Emreyî û Kuçeya 566. ya Taxa Şêx Şamilî temam bî.

'Cayê awanîyanê rijnayeyan yenê pakkerdiş'

Mudirê Şûbeyê Eşteyanê Huşkan ê Serekîya Daîreya Pawitiş û Kontrolê Cugehî Mehmet Baranî derheqê xebatan de agahî da û wina vat: "Awanîyê metrukî û keyeyê çopî yê ke teberê çarçewaya tebdîlo şaristankî de manenê, hetê ekîbanê ma ra bi kontrol yenê rijnayîş. Nê awanîyê ke seba şuxulnayîşê madeyan û problemanê emnîyetî zemîn amade kenê, bi makîneyanê karî yenê rijnayîş; mendeyê ke vejîyenê, benê warê rokerdişî. Badê rijnayîşî warî yenê pakkerdiş û benê biserûber. Heta ewro rijnayîşê 32 awanîyanê metrukan ame kerdiş."

'Seba taxe problemo tewr gird wedarîya'

Muxtara Taxa Şêx Şamilî Çîçek Gozen keyfweşîya xo ya nê xebatan îfade kerd û wina vat: "Keyeyê metrukî bîyî zaf, problemî zî pîya zêde bîyî. Nê keyeyî bîyî merkezê girêdayeyanê madeyan, dizdan û çeteyan. Şaredarîya Şaristanê Girdî û Şaredarîya Baglarî nê keyeyê metrukî pêro rijnayî, ez înan rê sipas kena. Seba taxa mi problemo tewr gird no bî; no problem wedarîya."