Şaredarîya Amedî ya Şaristanê Girdî verê varano ke şaristanî de yeno pawitiş, seba vernîgirewtişê pêserbîyayîşê awe û laseran dest bi xebata pakkerdişî ya hîraye kerd. Xebate de ke seyan personelî şewe wezîfe kenê, izxarayê awa varanî yê cade û bulwaranê qezayanê merkezî yew bi yew yenê pakkerdiş.

Ekîbê ke bi koordînasyonê Serekîya Daîreya Pawitiş û Kontrolê Dorûverî ameyî awankerdiş, şewe rayîranê serekeyan de izxarayan pak kenê. DÎSKÎ û serekîyê daîreyanê Pawitiş û Kontrolê Dorûverî, Park û Baxçeyan û Karanê Weşîye bi seyan personelan beşdarê xebatan benê. Ekîbî velg, çop, herre û eşteyanê bînan izxarayan ra vejenê ke wextê varanî de eşkenê vernîya rayîrê awe bigîrê.

Çar qezayanê merkezî de xebata hemwexte

Rezan de Bulwarê Kamişlo, Cadeyê Orhan Dogan, Cadeyê Evrim Alataş û Bulwarê Aram Tigran; Peyas de Cadeyê Nazim Hîkmetî, Bulwarê Firatî, Bulwarê Mehabadî, Cadeyê Abdulkadir Aksu, Cadeyê Kayapinar û Bulwarê Rihayî; Bajaro Newe de Bulwarê Mehmet Akîf Ersoy, Cadeyê Îstasyon, Cadeyê Gevran, Cadeyê Kişla û Bulwarê Xarpêtî; Sûr de zî Cadeyê Înonu, Cadeyê Turîstîk û Cadeyê Gazi de izxarayî yenê pakkerdiş.

Ekîbê Şaredarîya Şaristanê Girdî do kontrol û xebatanê pakkerdişî yê verê varanî dewam bikerê ke cuya şaristanî ser o tesîrê varanî yê nebaşî tewr kêmî bibê.

Çarnayox: Mehmet Olmez