Serekîya Daîreya Polîtîkayanê Cinîyan bi şîarê “Vera şîdetî pê têkoşînê rêxistinkerdeyî nika wextê cinîyan o” bernameyêko hîra amade kerd. Bernameyî ewro bi Komxebata Planê Çalakî yê Seypêyîya Herêmkîye dest pêkerd. Destpêkê çalakîyanê 25ê Teşrîna Peyêne do 12ê teşrîna peyêne saete 11.00 de Parka Anitî de bêro kerdiş.

Roniştişê agahdarkerdişî

Mabênê 11-27ê teşrîna peyêne de Merkezanê Cuya Cinîyan, awanîya xizmetî ya şaredarîye û qezayanê Hêni, Pîran û Karazî de seba cinîyan roniştişê agahdarkerdişî do bêrê organîzekerdiş. Roniştişan de tewirê şîdetî, mekanîzmayê muracatî û şîdeto dîjîtal do bêrê qiseykerdiş. Seba personelê şaredarîye zî 19ê teşrîna peyêne saete 13.00 de atolyeyêk do bêra viraştiş.

Turê bisîkletan, zîyaretê keyeyan û standî

14ê teşrîna peyêne saete 13.30 de Grûba Bisîkletan a Cinîyanê Amedî reyde Parka Koşuyoluyî ra heta Meydanê Berê Koyî turê hişyarîye do bêro kerdiş. Mabênê 16-20ê teşrîna peyêne de Taxa Kaynartepe û Seyrantepe de keyeyî do bêrê zîyaretkerdiş û broşurî bêrê vilakerdiş. 23-25ê teşrîna peyêne de zî kampusê Unîversîteya Dîcle û verê Camîyê Girdî de standî do bêrê ronayîş.

Vîrameyîşê cinîyanê ke ameyî kiştiş

Bi hemparîya Meclîsê Cinîyan 16ê teşrîna peyêne saete 13.00 de Parka Aştî de seba vîrardişê cinîyanê ke ameyî kiştiş şitilî do bêrê ronayîş. 20ê teşrîna peyêne saete 13.00 de zî Sumerpark de darêk do sey “Dara Vîrî” bêra namekerdiş û nameyê cinîyanê ke ameyî kiştiş do na dare de gandar bimanê.

Tadayox: Mehmet Olmez