Sempozyûmê “Heqê Qiseykerdişî: Vîrê Komelî, Şahîdîye û Travma” ke bi mêmandarîya Şaredarîya Amedî ya Şaristanê Girdî meşte dest pêkeno û do di rojî dewam bikero, amanc keno ke hîsê bêcezayîye, nêqedîyayîşê prosesanê şîn û şertê weşbîyayîşê şexsî û kolektîfî cayê vîrî yê şaristanî bi perspektîfêka pêroyî bêrê qiseykerdiş.

Sempozyûm ke bi hemkarîya Şaredarîya Amedî ya Şaristanê Girdî, Komeleya Xebatanê Travmayî û Forumê Aştî û Azadîya Komelkîye yeno organîzekerdiş, do 7–8ê Teşrîna Peyêne de Salona Konferansî ya Alî Emîrî ya Şaredarîya Şaristanê Girdî de bibo. Sempozyûmî de ke pispor, akademîsyen û hemparê şaristanî yenê têhet, vîrê komelî, şahîdîye û travma bi zaf hetan do bêrê qiseykerdiş.

Weşbîyayîşo şexsî û kolektîf

Sempozyûm amanc keno ke seba travmayanê komelkîyan zemînêkê ziwanêkê hemparî awan bikero. Sempozyûmî de bale ancîya ser o ke Amed şaristanêk o ke ra 1915î heta vindîkerdişanê bi zor ê serranê 1990an û heta rijnayîş û vengkerdişê Sûrî yê serranê 2015–2016î rêçanê zaf tecrubeyanê tarîxîyan anceno.

Sempozyûm ke heta formê pêşkêşîyanê klasîkan ra teber sey warê dîyalogî yeno ramitiş, bi şahîdîyanê beşdaran û hemwelatîyan do dewlemend bibo; tede do bi kurdkî û tirkî çarnayîşo hemwext bêro kerdiş.

Roniştişê roja verêne

Bername do 7ê teşrîna peyêne 2026 şemeyî saete 09.45 de bi qiseykerdişanê akerdişî dest pêbikero. Dima roniştişê “Vengê Bêvengkerdeyî: Ziwan, Nasname û Travmaya Mabênê Neslan”, “Vindîbîyayîş û Şahîdîye: Vindîkerdişo bi Zor, Bêcezayîye û Şîn”, “Xoverdayîş û Vîrê Cinîyan” û “Çîyo ke Beden de Mendo: Binpaykerdişê Heqan, Vîrê Bedenî û Şertê Tamîrkerdişî” do bêrê kerdiş. Saete 17.30–18.40 de Roniştişê Pêşnîyazanê Polîtîkayan do bibo; amanc o yo ke doneyê nê roniştişî rasterast piştî bidê merkezê piştîdayîşê psîkokomelkî ke Şaredarîya Şaristanê Girdî do nêzdî de akero û xebatanê vîrê şaristanî û hemwelatîyanê ke cayê xo ra bîyî.

Roja dîyine de Rayîrşîyayîşê Vîrî

8ê teşrîna peyêne yewşemeyî saete 09.30 de Rayîrşîyayîşê Vîrî bi rayberîya Derya Bozarslan a Merkezê Vîrî Meydanê Berê Koyî ra do dest pêbikero û Berê Seray, Mînareya Çarlingine, Dêra Surp Giragos a Armenîyan, Kilîseyê Surp Sarkis, Abîdeyê Wijdanê Hemparî û Goristanê Armenîyan ra do bivîyaro. Rayîrşîyayîş bi 20 kesan sînordar o û muracatî do 7ê teşrîna peyêne de salona sempozyûmî de bêrê girewtiş. Saete 14.30–16.00 de zî Atolyeya “Çîyê ke Vîrê Ma de Mendî” do bêra organîzekerdiş.