Bulwarê Gaffar Okkanî bi 20 hezar nebatan û rayîrê vazdayîşî newe bî
Şaredarîya Amedî ya Şaristanê Girdî Bulwarê Gaffar Okkanî de projeyê serûberkerdişê dorûverî temam kerd. War 67 hezar û 500 metrekare yo û nika xizmetê hemwelatîyan de yo. Bulwar de binawanî newe bîye, rayîrê vazdayîşî ame viraştiş û 20 hezar û 93 dar, lem û nebatê xemilnayîşî ronîyayî.
Şaredarîya Amedî ya Şaristanê Girdî wazena ke şaristanî de warê keskî zêde bibê. Na çarçewa de projeyê serûberkerdişê dorûverî ke Serekîya Daîreya Park û Baxçeyan Bulwarê Gaffar Okkanî de da destpêkerdiş, temam bî. Proje warêkê 67 hezar û 500 metrekareyî de ame caardiş.
Xebatê binawanî û serawanî
Qonaxê verênî de sîstemê awedayîş, elektrîk û drenajî ameyî ronayîş û herre ame rokerdiş. Badê binawanî xebatanê serawanî dest pêkerd. Di rayîrê vazdayîşî ameyî viraştiş ke pîya teqrîben 5 hezar metre yê. Hemwelatî eşkenê nê rayîran de bigêrê û spor bikerê. Peyzajê bulwarî zî temam bî.
Bulwar de 20 hezar û 93 nebatî ronîyayî
Ekîban bulwar de 17 tewiran ra 20 hezar û 93 dar, lem û nebatê xemilnayîşî ronayî. Nînan ra 13 hezar û 207 gulî, 630 serwîyî û 170 tûyêr ê. Xebatan de darê ke verê cû uca bîyî ameyî pawitiş.
Bulwar bi binawanîya xo ya newîye, rayîranê vazdayîşî, warê keskî û bi hezaran nebatanê neweyan nika xizmetê hemwelatîyan de yo.
