Şaredarîya Amedî ya Şaristanê Girdî hîrê aşmanê peyênan de 9 hezar û 70 darî, 50 hezar û 200 lemî û 480 hezar vilê demserrî resnayî herre. Şaredarî plan kena ke heta peynîya serre 21 hezar darî, 100 hezar lemî û 1,5 mîlyon vilê demserrî biresna herre û warêko 580 hezar metrekareyî kesk bikera.

Serekîya Daîreya Parkan û Baxçeyan xebatanê darûberinkerdişî dewam kena ke warê keskî yê şaristanî zêde bibê û şaristan hîna biweşî bibo. Park, bulwar, goristan û cayanê cîyayan ê şaristanî de darî, lemî û vilê demserrî resenê herre.

Bi nê xebatan nêmeyê amancê 100 hezar leman ra zêdeyêr ame ca. Mudirê Şûbeyê Miqateyî yê Serekîya Daîreya Parkan û Baxçeyan Osman Yavuzî vat: “Ma hîrê aşman de 9 hezar û 70 darî û 50 hezar û 200 lemî resnayî herre; 480 hezar vilê demserrî zî ramitî. Amancê ma o yo ke heta peynîya serre 21 hezar darî, 1,5 mîlyon vilê demserrî û 100 hezar lemî biresnê herre.”

Amancê 21 hezar daran: park, bulwar û goristanî

Amancê 21 hezar daran ra 8 hezarî seba Parka Şaristanî ya Mezopotamya, 5 hezarî seba Naturaparkî, 3 hezarî seba Bulwarê Gaffar Okanî, 3 hezarî seba Goristanê Neweyî û 2 hezarî seba cayanê cîyayan ê şaristanî yê.

Parka Şaristanî ya Mezopotamya de 8 hezar darî û 50 hezar lemî

Parka Şaristanî ya Mezopotamya çatrayîrê Bulwarê Diclekent û Bulwarê Mezopotamya de warêko 211 hezar û 656 metrekareyî de yena awankerdiş. Parke de 8 hezar darî û 50 hezar lemî do biresê herre; nê 50 hezar lemî nêmeyê amancê pêroyî yê şaredarî yê. Yavuzî vat: “Parke de kitabxaneyêko serakerde, di kafeyî, di tuwaletî, tîyatroyêko serakerde, rayîrê rayîrşîyayîşî, warê sporî û di warê kayê gedeyan ê girdî est ê.”

Awankerdişo xam ê awanîyanê parke qedêya; xebatê pirkerdişê herra xame zî nêzdîyê qedêyayîşî de yê. Xebatê binawanîya elektrîkî, sîstemanê awedayîşî, zemînê sertî, borduran û betonê rayîran zî dewam kenê.

Heta peynîya serre 580 hezar metrekare do kesk bibo

Yavuzî vat: “Ma do heta peynîya serre şaristanî de warêko 580 hezar metrekareyî kesk bikerê û daran ronê.”