Şaredarîya Amedî ya Şaristanê Girdî, bi amancê ke resê mîyanê şaristanî bikera hîna biemnîyet û konforin, xebatanê viraştiş, miqate û tamîrê rayîran dewam kena. Serekîya Daîreya Viraştiş, Miqate û Tamîrê Rayîran, qezaya Kayapinarî de goreyê bernameyê ke ameyo dîyarkerdene, cadeyan newe kena.

Cadeyê Nazim Hîkmetî rê 4 hezar û 700 ton asfalt

Cadeyê Nazim Hîkmetî ke ekîbî tede xebate ramenê, 980 metre derg û 30 metre hîra yo. Cade de bi pêroyî 4 hezar û 700 ton asfaltê tebeqeya werîyayîşî yeno rokerdene. Bi xebate yeno amanckerdene ke konforê ramitişî yê rayîrî bêro zêdekerdene û res bibo hîna biemnîyet.

Xebatê hîrê cadeyan ameyî temamkerdene

Çarçewaya bernameyî de ke qezaya Kayapinarî de yeno ramitene, xebatê asfaltî yê cadeyanê Talaytepe, Leyla Qasim û Baba Tahîrî ameyî temamkerdene. Badê rokerdişê asfaltê Cadeyê Nazim Hîkmetî, ekîbî do cadeyanê Abdulkadîr Aksu û Jîyan de dest bi xebatan bikerê.

Şaredarîya Şaristanê Girdî amanc kena ke bi temambîyayîşê bernameyî standardê rayîrî yê 6 rayîranê resî yê muhîman ê qezaya Kayapinarî berz bikera.