Rayîrê mabênê Farqîn û Hezroyî de qîrkerdiş temam bî
Şaredarîya Amedî ya Şaristanê Girdî Rayîrê Grûbe yê Çardakî de qîrkerdiş temam kerd. No rayîr 20,3 kîlometre yo û Farqîn û Hezro resneno pê. Erxenî de zî Rayîrê Grûbe yê Încehidirî de 15 kîlometreyî temam bîyî, 5 kîlometreyan de xebate dewam kena.
Şaredarîya Amedî ya Şaristanê Girdî wazena ke taxanê dewan de res asan bibo. Coka xebatanê viraştiş û newekerdişê rayîran dewam kena. Na çarçewa de Farqîn, Hezro û Erxenî de rayîranê grûbe de qîrkerdişê qatê yewin û dîyinî ame kerdiş. Nê rayîrî taxan resnenê pê.
Rayîrê Grûbe yê Çardakî de xebate temam bîye
Rayîrê Grûbe yê Çardakî qezayanê Farqîn û Hezroyî resneno pê. Nê rayîrê 20,3 kîlometreyî de qîrkerdişê qatê yewin û dîyinî temam bî. No rayîr şino taxanê Çardak, Eskîkoy, Susuz, Gunduz, Uçbasamak, Otluk û Karahaciyî yê Farqînî û taxanê Bayirduzu û Yazgiyî yê Hezroyî. Bi newebîyayîşê rayîrî res asan bî.
Rayîrê Grûbe yê Încehidirî de 15 kîlometreyî temam bîyî
Qezaya Erxenî de Rayîrê Grûbe yê Încehidirî taxanê Savaş, Încehidir, Çakartaş û Selmanî ra vîyareno. Rayîr 20 kîlometre yo. 15 kîlometreyan de qîrkerdişê qatê yewin û dîyinî temam bî. Ekîbî 5 kîlometreyanê mendeyan de xebatanê xo dewam kenê.
Çarnayox: Mehmet Olmez
