Çalakîyanê 25ê Teşrîna Peyêne dest pêkerd
Şaredarîya Amedî ya Şaristanê Girdî û şaredarîyanê qezayan, çalakîyê 25ê Teşrîna Peyêne Roja Têkoşînê Şîdetî yê Vera Cinîyan a Mîyanneteweyî bi eşkerayîya çapemenîye ke Parka Anitî de ameye dayîş, dayî destpêkerdiş. Eşkerayî de ke bale ancîyaye qerardarîya girdkerdişê têkoşînê cinîyan ê rêxistinkerdeyî ser o, muhîmîya merkezanê piştîpêdayîş û cuya cinîyan û xebatanê taxe û dewan ame dîyarkerdiş.
Bernameyê çalakîyan ke hetê Serekîya Daîreya Polîtîkayanê Cinîyan a Şaredarîya Amedî ya Şaristanê Girdî û şaredarîyanê qezayan ra ame amadekerdiş, dest pêkerd. Eşkerayîya çapemenîye de ke Parka Anitî ya qezaya Bajarê Neweyî de ameye dayîş, hemşaredarê cinî yê şaredarîyanê qezayan, Hemvatoxa Meclîsê DBB'yî Demet Ceylan, endamê meclîsî, Sereka Daîreya Polîtîkayanê Cinîyan Ozdene Gurbuz Sumer û temsîlkaranê rêxistinanê komelê sîvîlî ca girewt.
Sumere ke eşkerayî daye, va ke ê ameyê têhet ke vera tehekumê sîstemê camêrdserdestî têkoşînê rêxistinkerde gird bikerê û cuyêka seypê û azade bi piştîpêdayîşê cinîyan awan bikerê.
‘Şîdetê vera cinîyan tena serebûtê tekî nîyo’
Sumere va: “Şîdetê vera cinîyan serebûtanê tekan ra îbaret nîyo; netîceya zîhnîyetê camêrdserdestî yo ke cuya komelkî, sîyasî, ekonomîk û kulturî de bîyo dezgehkî.”
Seba Gulîstane Doku û Rojîne Kabaîş vengdayîşê edaletî
Sumere va: “Ma wazenê ke aqubetê Gulîstane Doku ke hema nêameyo roşnkerdiş û merdişê Rojîne Kabaîş o şikbar bi heme hetanê xo eşkera bibê; seba heme cinîyanê ke bi şîdetê camêrdserdestî cuya xo ra bîyê heqîqet bivejîyo meydan, edalet bêro caardiş û berpirsîyarî hesab bidê.”
Merkezê piştîpêdayîşê cinîyan
Sumere dîyar kerd ke ê têkoşînê vera şîdetî sey parçeyêkê vurîyayîşê komelkî vînenê û bale ante muhîmîya merkezanê piştîpêdayîş û cuya cinîyan, sitargehan, waranê berhemardişê kolektîfî û xebatanê taxe û dewan ser o.
‘Ma do têkoşînê azadî û seypêyîye ra fek nêveradê’
Sumere va ke ê do xebatanê 25ê Teşrîna Peyêne taxan, kuçeyan û dewan de cinîyan reyde dewam bikerê û wina va: “Ma reyna îlan kenê: Ma do heqê cuya cinîyan, azadîya înan û têkoşînê seypêyîye ra fek nêveradê!” Sumere venga heme cinîyan û raya pêroyî ya demokratîke da ke beşdarê çalakîyan bibê û mesajê “Bi hêzê xo û îradeyê azadî nika wextê cinîyan o! Jin, jiyan, azadî!” da.
Broşurî ameyî vilakerdiş
Badê eşkerayî cinîyan semtê Ofîsî de broşurê agahdarkerdişî hemwelatîyan rê vila kerdî. Xebatê şaredarîye yê 25ê Teşrîna Peyêne do merkezê şaristanî û qezayanê teberî de dewam bikerê.
