Şaredarîya Amedî ya Şaristanê Girdî 7 cayanê şaristanî de xizmetê înternetî yê bêpereyî dana. Bi xizmetê Wi-Fi yê park, meydan, cayanê tarîxî û otogarî yeno amanckerdiş ke resayîşê hemwelatîyan û turîstan ê înternetî asan bibo.

Çarçewaya “Planê Çalakî yê Şaristananê Aqilmendan” de, torra Wi-Fi ya bêpere ya ke Serekîya Daîreya Karanê Agahî qonaxa verêne de hîrê cayan de ronaybî, bi îlawekerdişê waranê neweyan resaye hewt cayan.

Torra înternetî ya bêpere hîrayêr bîye

Xizmet verê cû Meydanê Berê Koyî, Warê Hz. Suleyman û Termînalê Mabênê Şaristanan ê Amedî (DIŞTI) de dest pêkerdbi. Nika Daristanê Şaristanî û Tema Park (Kayapinar), Camîyo Gird (Sûr) û Sumerpark (Yenîşehîr) zî ameyî îlawekerdiş. Hemwelatî eşkenê nê cayan de bi komputer yan telefonanê aqilmendan bikewê înternet.

Girêdayîş badê tesdîqê nasnameyî beno

Seba îstîfadekerdişî, ganî hemwelatî eyaranê Wi-Fi yê cîhazê xo ra bi torra Şaredarîya Amedî ya Şaristanê Girdî girêdaye bibê. Badê ke ekranê rayberîye de tesdîqê nasnameyî temam bibo, înternet eşkeno bêpere bêro xebitnayîş.

Tadayox: Mehmet Olmez