DBB'yî de Belgeya Tepşî ya Têkoşînê Vera Şîdetî ameye erjnayîş
Şaredarîya Amedî ya Şaristanê Girdî seba mudiranê şûbeyan atolyeyêka erjnayîşî organîze kerd. Atolye de Belgeya Tepşî ya Têkoşînê Vera Şîdetê Cinsîyetê Komelkî ameye qiseykerdiş.
Na belge par ameybî îmzakerdiş. Atolye hetê Meclîsê Cinîyan ê Şaredarîya Amedî ya Şaristanê Girdî û Yewîna Perwerdeyî û Yewîna Şîdetî yê Serekîya Daîreya Polîtîkayanê Cinîyan ra ameye organîzekerdiş. Atolye salona kombîyayîşî ya meclîsê şaredarîye de ameye viraştiş.
Verê perwerdeyê azadkerdişê cinsîyetê komelkî ame dayîş. Dima şîdeto ke neseypêyîya cinsîyetê komelkî ra vejîyeno ame qiseykerdiş. Eyleme Kaya îzah kerd ke çira hewceyîya na belge est a û amanc, çarçewa û prensîbê belge yê bingeyinî çi yê. Ebru Eker zî polîtîkayê vernîgirewtoxî, mekanîzma û prosesê badê xeberdayîşê şîdetî û cezayî ardî ziwan.
