Meclîsê Cinîyan ê DBB'yî seba cinîyanê ke ameyî kiştiş “Dara Vîrî” viraşte
Meclîsê Cinîyan ê Şaredarîya Amedî ya Şaristanê Girdî Sumerpark de “Dara Vîrî” viraşte. Na dare seba cinîyan a ke di serranê peyênan de şaristan de ameyî kiştiş. Xebate çarçewaya 25ê Teşrîna Peyêne Roja Têkoşînê Şîdetî yê Vera Cinîyan a Mîyanneteweyî de bîye.
Meclîsê Cinîyan ê Şaredarîya Amedî ya Şaristanê Girdî çarçewaya 25ê Teşrîna Peyêne de xebatêka manadare kerde. Sumerpark de darêk bîye “Dara Vîrî”. Nameyê cinîyan ke di serranê peyênan de şaristan de ameyî kiştiş, dare ra ameyî aliqnayîş. Wina cuya înan û vîrameyîşê înan vîrê komelî de gandar manenê.
‘Peygoşkerdiş zî parçeyêkê şîdetî yo’
Sekreteryaya Meclîsê Cinîyan ê DBB'yî ra Rojda Çeçen akerdişê bernameyî de qisey kerd. Çeçen va ke peygoşkerdiş zî parçeyêkê şîdetî yo û têkoşîn berpirsîyarîya herkesî ya hempar a. Çeçen ard ziwan ke dejê di cinîyan ke nêzdî de Sumerpark de ameyî kiştiş, hema zî zerrîyan de yo. Aye va ke nameyê ke dare ra ameyî aliqnayîş, tena name nîyê. Nê nameyî cuya nêmcetmenda û vengo birnaye yê. Nê vîrê komelî yê cinîyan ê ke ganî vîr ra nêşêrê.
‘Ganî ma vera çîyê ke vînenê berpirsîyarîye zî bigîrê’
Sereka Daîreya Polîtîkayanê Cinîyan Ozdene Gurbuz Sumer va ke Meclîsê Cinîyan na xebate bi kolektîf kerda. Sumer va ke çîyê ke ma nêvînenê, ge-ge ma bi zehmet anê xo vîrî. Aye dîyar kerd ke bi Dara Vîrî tena dîyayîş amanc nêkenê. Wazenê ke vera çîyê ke vînenê berpirsîyarîye hîs bikerê û berpirsîyarîye bigîrê.
Sumer va ke wazenê bi na dare cuya cinîyan û vîrê înan vîrê têkoşînê cinîyan de nexş bikerê. Goreyê Sumer, berpirsîyarîya vîrardişî do piştîpêdayîşî xurt bikera û bibo sebebê têkoşînê cuyêka seypê, azad û bêşîdete.
Sumer hêvî kerd ke dare bi kokanê xo vîrê komelkî û kolektîfî xurt bikera, bi gilanê xo zî biresa cuyêka azad û bêşîdete. Aye soz da ke do têkoşînî gird bikerê ke nameyêko newe dare rê îlawe nêbo.
Açarnayox: Mehmet Olmez
