Meclîsê Cinîyan ê Partîya Seypêyî û Demokrasî ya Şaran (DEM Partî), eşkerayîya xo ya derheqê qirkerdişanê cinîyan de venga camêrdanê şaristanî da ke pîya tepş bigîrê. Camêrdan ke piştî daye vengdayîşî, verê awanîya Rêxistina Wîlayetî ya DEM Partî de eşkerayîyêk daye. Hemşaredar, parlamenter û temsîlkarê partîyanê sîyasîyan û rêxistinê komelê sîvîlî zî mîyanê înan de bîyî. Hemşaredar Emîn Ay zî beşdarê eşkerayîye bî û piştî daye vengdayîşê cinîyan.

‘Kiştişê cinîyan polîtîk o’

Parlamenterê DEM Partî yê Amedî Serhat Erenî ke eşkerayîye de qisey kerd, qirkerdişê cinîyan ê aşma peyêne ardî vîrî û dîyar kerd ke cinî hetê nêzdîyanê xo ra ameyî kiştiş. Erenî vat ke cinî bi serran kuçe, meydan, Meclîs, şaredarî, keye û cayanê karan de vera şîdetê camêrdan têkoşîn kenê û wina dewam kerd: “Cinî bi serranê dergan vanê ke kiştişê cinîyan polîtîk o û ganî nîzamo komelkî yo ke no şîdet berhem dano, bivurîyo. Ewro zî verê çend seatan seba Ayfere ameyî pêser û vatişê xo vatî. Derheqê şîdetê camêrdan, serdestîya camêrdan û berpirsîyarîya ma de venga ma camêrdan zî da. Ma no vatiş eşnawit; ma no mesaj girewt.”

Badê eşkerayîye vengdayîşê şarî ame kerdiş ke beşdarê rayîrşîyayîşî bibê. Rayîrşîyayîş do 30ê êlule de saete 17.00 de awanîya Rêxistina Qeza ya Baglarî ra heta Parka Qerenfîlî bêro kerdiş.

Açarnayox: Mehmet Olmez