Hemşaredarê Şaredarîya Şaristanê Girdî Emîn Ay, Hemverfeka Meclîsê DBB'yî Demet Ceylan û endamê meclîsî bernameyêk de heyetê Ermenîstanî reyde ameyî têhet ke Komeleya OSGÎAD otelêk de organîze kerdbî. Heyetê Ermenîstanî de karsaz û rojnamegerî est bîyî. Amed de seba averberdişê têkilîyanê ekonomîkan pêdîyayîşî ameyî kerdiş.

Hemşaredar Emîn Ayî ke bernameyî de qisey kerd, bi nameyê Şaredarîya Şaristanê Girdî silam da endamanê heyetî û îdarekaranê OSGÎADî.

‘Ma nê pêdîyayîşî sey pêdîyayîşêko asayî nêvînenê’

Ayî dîyar kerd ke ê keyfweş ê ke heyetê Ermenîstanî şaristano qedîm Amed de mêman kenê û beşdarê nê pêdîyayîşî benê. Ayî îfade kerd ke ê nê pêdîyayîşî sey pêdîyayîşêko asayî nêvînenê û bawer kenê ke no pêdîyayîş do piştî bido xurtbîyayîşê têkilîyanê mabênê şaran. Ayî vat ke ê heyetî sey kesanê ke ameyê keye û şaristanê xo vînenê û wazenê ke mêmanî zî Amed sey keye û şaristanê xo bivînê.

‘Ganî têkilî bi heme hetanê xo aver şêrê’

Ayî îfade kerd ke sey îdareyê herêmkî ê do keyfweş bibê ke seba xurtbîyayîşê têkilîyanê mabênê şaran çi wezîfe bikewo înan bîyarê ca. Ayî bale ante ser o ke ganî no têkilî û pêdîyayîş tena hetê ekonomîkî ra nêrê erjnayîş. Ayî vat ke ê bawer kenê ke têkilî bi heme hetanê xo do feyde bidê û ganî nê hetî de aver şêrê.

‘Averberdişê têkilîyan muhîm o’

Ayî bale ante ser o ke averberdişê têkilîyanê mabênê şaran muhîm o û ganî no bi hişyarîya dejanê vîyarteyî bêro kerdiş bê ke nê dejî xo vîr ra bêrê kerdiş. Ayî îfade kerd ke ganî dejê ciwîyayeyî vernîya averşîyayîşê têkilîyan de nêbê asteng û hêvî kerd ke seba hewanayîşê nê astengan têkilî bêrê zafrengkerdiş.