Hemşaredarî Serra Bucak û Emîn Ay zîyaretanê xo dewam kenê ke seranserê şaristanî de esnaf û hemwelatîyan reyde rasterast têkilî ronê. Na çarçewa de bernameyê Serekîya Daîreya Çapemenî Weşan û Têkilîyanê Şarî de Hemşaredarî Bucak û Ay, Hemşaredarê Bajarê Neweyî Mehmet Ergun, endamanê meclîsê DBB'yî û serekanê daîreyanê têkilîdaran reyde pîya Taxa Şehîtlîkî de esnaf û hemwelatîyan reyde ameyî têhet.

Waştişê esnafan cayê xo de ameyî goşdaritiş

Hemşaredarî Bucak û Ay ke Cadeyê Şehîtlîkî de cayê karan yew bi yew gêrayî, esnafan rê karê xeyrî waşt. Hemşaredaran waştiş û pêşnîyazê derheqê binawanî, serûberkerdişê dorûverî û xizmetanê şaredarîye de cayê xo de goşdaritî. Hemwelatîyan derheqê park û waranê keskan, roşnkerdişê kuçeyan, pakkerdiş û girêdayîşê madeyan de waştişê xo ardî ziwan. Esnafan zî bale ante ser o ke seba tengîya ekonomîke, zêdebîyayîşê mesrefan û kêmîbîyayîşê hêzê herînayîşî êdî nêeşkenê kar bikerê.

‘Ma bi fehmê şaredarîya beşdare xebitîyenê’

Hemşaredaran ke problemê esnaf û hemwelatîyan yew bi yew not kerdî, dîyar kerd ke bi fehmê îdareyê herêmkî yo beşdar hereket kenê û do dewam bikerê ke hewceyîyanê şaristanî warî de tesbît bikerê û esnaf û şarê taxe reyde pîya çareyan peyda bikerê.

Hemşaredaran îfade kerd ke têkoşînê vera madeyanê hişberan de tena polîtîkayê emnîyetî bes nîyê, ganî bi projeyanê komelkîyan, merkezanê ciwanan û waranê kultur û sporî vurîyayîşêko komelkî yo kokdar bêro caardiş.

Waştişê binawanî û dorûverî do bêrê koordînekerdiş

Hemşaredaran dîyar kerd ke derheqê binawanî û laseranê badê varanî de xebatê hewceyî do lez bêrê kerdiş û waştişê serûberkerdişê dorûverî û pakkerdişî zî do lez bêrê koordînekerdiş. Hemşaredaran sewbîna va ke haya înan krîzê ekonomîkî ra est a û ê do dewam bikerê ke kişta esnaf û hemwelatîyanê kêmameyeyan de bê.

Esnafanê Taxa Şehîtlîkî zî memnûnîya xo îfade kerde û Hemşaredaran Serra Bucak û Emîn Ayî rê teşekur kerd.