Ekîbê “Ca de Çarekerdişî” ke binê banê Mudirîya Şûbeyê Têkilîyanê Şarî ya Serekîya Daîreya Çapemenî Weşan û Têkilîyanê Şarî de xebatanê xo kenê, zîyaretanê esnafan dewam kenê. Ekîbî ke pawitişanê hemwelatîyan ê derheqê xizmetanê şaredarîye de rasterast goşdar kenê, Sîteya Sanayî ya 4. de cayê karan zîyaret kerdî û teqrîben 800 esnafan reyde ameyî têhet.

Resî ra heta binawanî waştişî ameyî goşdarîkerdiş

Zîyaretan de esnafan derheqê res, newekerdişê şebekeyê awa şimitişî, hewceyîya konteyneranê çopî û zêdekerdişê waranê keskan de waştişê xo vatî. Esnafan sewbîna waşt ke wesayîtê bêkarî yê zereyê sîteya sanayî bêrê arêdayîş û seba eşteyanê ke eşkenê newe ra bêrê xebitnayîş qutîyê neweraxebitnayîşî bêrê ronayîş.

Seba arêdayîşê eşteyan yewîna têkilîdare reyde qisey bî

Goreyê waştişan Serekîya Daîreya Vurîyayîşê Îklîm û Sifir Eşteyî reyde qisey bî û nuşteyêko fermî ame şawitiş. Ame dîyarkerdiş ke karê arêdayîşê eşteyan hetê şîrketî ra yeno kerdiş û serekîya daîre şîrketê têkilîdarî ra waşt ke eşteyê sîteya sanayî bêrê arêdayîş.

Prosesê arêdayîşê wesayîtanê bêkaran ame erjnayîş

Seba waştişê arêdayîşê wesayîtanê bêkaran ekîbanê Zabitaya Trafîkî reyde zî qisey bî. Ekîbanê Zabitaya Trafîkî da zanayîş ke înan na babete de verê cû çend rey yewînanê emnîyetî reyde qisey kerdo û bê destûrê emnîyetî xebata arêdayîşê wesayîtan nêşêna bêra kerdiş.

Çarnayox: Mehmet Olmez