Hemşaredara Şaredarîya Amedî ya Şaristanê Girdî Serra Bucak Pêdîyayîşê Keda Cinîyan ê Peyasî yo 3. û Festîvala Kulturî de qisey kerd û bale ante ser o ke amancê înan o yo ke vera feqîrîya cinîyan a ke xorîn bena, waranê îstîhdam û berhemdayîşê cinîyan hîra bikerê û têkoşînê înan ê rêxistinbîyayeyî xurt bikerê.

Pêdîyayîşê Keda Cinîyan ê Peyasî yo 3. û Festîvala Kulturî dest pêkerd ke hetê Şaredarîya Peyasî ra ame organîzekerdiş. Festîvale 23-25ê teşrîna verêne de Parka 75 a qezaya Peyasî de do dewam bikera. Hemşaredarê Şaredarîya Amedî ya Şaristanê Girdî Serra Bucak û Emîn Ay, Hemşaredarê Şaredarîya Peyasî Berîvan Gulşen Sincar û Cengîz Dundar, Hemverfekê DBB'yî Demet Ceylan û Ayhan Karatekîn, hemşaredarê qezayan û zaf cinîyan merasîmê akerdişî de ca girewt.

Seba asayîşê keda cinîyan xebatê warî

Berîvan Gulşen Sincar dîyar kerd ke cinîyanê berhemdayoxan, grûbanê komunan û kooperatîfanê cinîyan pêdîyayîşî de keda xo pîya arde meydan. Sincare ard ziwan ke bi seyan kesan reyde xebatê warî kerdî û goreyê tesbîtanê nê xebatan qerar da ke festîvale organîze bikerê.

Vera feqîrîya cinîyan warê îstîhdam û berhemdayîşî

Bucake dîyar kerd ke amanco verên ê pêdîyayîşanê keda cinîyan o yo ke vera feqîrîya cinîyan astengê vernîya cinîyan bêrê hewanayîş ke îstîhdam û cuya xebate de cayê xo bigîrê. Bucake vat ke amanco dîyin zî o yo ke têkoşînê cinîyan ê rêxistinbîyayeyî ra pêro biewnîyê: “Ma nê heme çîyan sey mekanîzmayêk vînenê ke do hişmendîya rêxistinbîyayîşê cinîyan û pêtbîyayîşê înan ê têkoşînê vera şîdetî zêde bikero.”

'Ma wazenê çareserîyanê kolektîfan bivirazê'

Bucake bale ante muhîmîya bostananê cinîyan ser o û vat: “Ma wazenê nê şaristanî de merkezî ra heta dewan her warê ke yê şarî yo, berhemdayîşê cinîyan û ciwanan rê û îstîhdamê cinîyan rê akerê. Badê nê pêdîyayîşî ma wazenê zêdeyêr cinîyan reyde bêrê têhet, hewcedarîyanê înan goşdarî bikerê û nê hewcedarîyan rê çareserîyanê kolektîfan bivirazê.”

Şaredarîya Şaristanê Girdî zî do hîrê rojî bi çar standan festîvale de ca bigîro. Tirşîyê ke berhemanê bostananê Şaredarîya Şaristanê Girdî de ameyî amadekerdiş, do reya verêne hetê cinîyan ra standan de bêrê rotiş.

Çarnayox: Mehmet Olmez