Bi pêşengîya Meclîsê Cinîyan ê DEM Partî, qezaya Baglarî de seba ke bale bêra antiş qirkerdişanê cinîyan ser o, eşkerayîyêka çapemenîye ame organîzekerdiş. Hemşaredara Şaredarîya Şaristanê Girdî Serra Bucak, Verfeka Meclîsê Cinîyan ê DEM Partî Halide Turkoglu, Parlamentera DEM Partî ya Amedî Adalete Kaya, hemşaredarê şaredarîyanê qezayan, temsîlkarê partîyanê sîyasîyan û rêxistinanê cinîyan û zaf cinî beşdarê eşkerayîye bîyî. Eşkerayî Çatrayîrê Dortyolî de ame kerdiş.

Aşma peyêne de 4 cinî ameyî kiştiş

Hemşaredare Bucak dîyar kerd ke ê, heme rêxistinanê cinîyan ê warê têkoşînê vera şîdetî û waştişê sîyasî yê şaristanî reyde warî ra yê. Bucak vat: “Aşma peyêne de Amed de 4 cinî ameyî kiştiş. Ya peyêne Ayfere Çakmak a; tîya, Baglar de, kuçeyê keyeyê xo de, hetê mêrdeyê xo ra ameye kiştiş. Ayfere Çakmak 5 gedeyî peyê xo de verdayî. Verê cu zî di cinî hetê mêrdeyanê xo ra bi xape ameyî antiş warê pêroyî û ameyî kiştiş; înan waştêne ke ci ra abirîyê yan zî ci ra abirîyaybî.”

‘Ganî îdareyê herêmkî zî polîtîkayanê xo xurt bikerê’

Bucak bale ante ser o ke hişyarîye, hişê cinsî û xebatê rêxistinkerdişî bi têkoşînanê giranan ameyî meydan. Goreyê Bucak, ganî heme têkoşînî reyde îdareyê herêmkî û polîtîkayê cinîyan zî pîl bibê. Bucak persa: “Nê şaristanî de cinî xo çiqas ewle de hîs kenê? Çiqas resenê mekanîzmayan ke eşkenê bawerîya xo pê înan bîyarê?”

‘Mekanîzmayî vera polîtîkayanê pederşahî zehmetî vînenê’

Bucak dîyar kerd ke têkoşînê cinîyan û torrê ke înan awan kerdê, tena bes nîyê ke kiştişanê cinîyan vindarnê; çunke no problemêkê sîstemî yo. Goreyê Bucak, têkilîya serdestîye ke beden û cuya cinîyan ser o ameya awankerdiş, her ca ra vila bena. Bucak ard vîrî ke înan vera şîdetî xebatê hişyarîye, perwerde, kampanyayî û Xeta Alo Şîdetî awan kerdî, û vat: “Ewro ganî ma vajê ke nê mekanîzmayî vera polîtîkayanê pederşahî yê serdestî zehmetî vînenê.”

‘Ma bêçare nîyê’

Bucak vat: “Cayo ke ma tede zehmetî vînenê, ma do alternatîfê xo bivînê. Ma cinî Amed de, Adana de, Îstanbul de, Anqara de, Tirkîya de her ca bêçare nîyê!”

Bucak tepşê dadgehan zî rexne kerd. Bucak dîyar kerd ke tatbîqkerdişê Qanûnê bi hûmara 6284 de qelsîyî est ê û dadgehî bi “kravate” yan zî “kêmîkerdişê halê rindî” faîlan bêceza verdanê. Derheqê dosyayanê Gulistane Doku û Rojîne Kabaîş de Bucak bale ante ser o ke delîlan dezgehê dadî ney, cinî û rêxistinê komelê sîvîlî vînenê. Bucak vat ke eke têkoşînê keyeyan û cinîyan nêbîyêne, dosya do bi vateyê “xokiştiş” bipadîyayêne û vat: “Cinî wazenê biciwîyê.”

Venga camêrdan da

Bucak venga camêrdan zî da û vat: “Wa camêrdî pêrodayîş û şîdetê cîranê xo bivînê; vengê xo vejê, rolê xo bigîrê xo ser! Tena komelo rêxistinbîyaye eşkeno şîdetî vindarno û birînanê yewbînan bipêşo.”

Bucak qiseykerdişê xo bi nê vateyan qedêna: “Heta ke ma nê problemî çareser bikerê, ganî ma hişyar û rêxistinbîyaye bimanê û ma pêrune pîya hesabê nê qirkerdişanê cinîyan bipersê. Cinî est ê û do bimanê; cinî tîya yê û cinî do wayîrê yewbînan bivejîyê.”

Çarnayox: Mehmet Olmez