Hemşaredara Şaredarîya Amedî ya Şaristanê Girdî Serra Bucak, bi minasebetê serrgêra 200. ya awanbîyayîşê "Yewîna Zabita", kedkaranê zabita reyde ameye têhet ke binê banê şaredarîye de wezîfe kenê.

Çalakî de Hemşaredare Bucake ra teber Hetkarê Sekreterê Pêroyî yê DBByî Muhabbet Erdogmuş û Ozlem Tekîn, Hemverfekê Meclîsê DBByî Demet Ceylan û Ayhan Karatekîn, serekê daîreyanê têkilîdaran û endamanê meclîsî ca girewt.

Hemşaredare Bucak ke çalakî de qisey kerd, hewteyê xebatkaranê zabita pîroz kerd û dîyar kerd ke ê hêvî kenê ke serranê ameyoxan de bixebitîyê bi şert û kapasîteyêka ke hîna rind bena û aver şina. Hemşaredare Bucake bale ante muhîmîya xebate ya bi struktûrêk ser o ke fehmkerdiş û têkilî de, xeletfehmkerdişî ra durî yo û dîyalog, muzakere û qanîkerdişî esas gêno.

'Ma fehmê kedkar û xebatkarbingeyinî qebûl kenê'

Hemşaredara Bucake zehmetîyê warê zabita ardî ziwan û dîyar kerd ke kes nêwazeno nê warî hîna zaf bikero zehmet û îfade kerd ke ê wazenê bi perwerde, bernameyanê averberdişê kapasîte, aktîvîte û înowasyonan biresê krîteranê unîversalan. Hemşaredare Bucake tekîd kerd ke her komel û şaristanî de problemê xo yê taybetî est ê û qeyd kerd ke nê amancî do bi xebatanê fedakaranê xebatkaran û parekerdişê tesbîtanê problem û hewceyîyan vejîyê meydan ke do bi xebatêka raşte bêrê kerdene.

Hemşaredara Bucake dîyar kerd ke ê struktûrêk tarîf kenê ke haştî û asayîşê xebate û dîyalogê mîyanê xo aver beno; ard ziwan ke ê fehmo klasîk ê "îdare vana, yewînî kenê" qebûl nêkenê û fehmêko kedkar û xebatkarbingeyin pawenê ke çimdarîyanê warî hesab keno. Hemşaredare Bucake dîyar kerd ke ganî eynî fedakarî, hesasîyet û çimdarîya haştîwaz û seypê vera komelî zî bêro domnayene û hewteyê teşkîlatê zabita reyna pîroz kerd.