Xebatê ke hetê Serekîya Daîreya Park û Baxçeyan ra yenê ramitene, cayê pêresayîşê Bulwarê Prof. Dr. Necmettîn Erbakanî û Bulwarê Feratî de dewam kenê. Yeno amanckerdene ke Naturapark ke do bibo parka tewr girde ya şaristanî, kulturê cuya ekolojîke rê piştî bido.

%55ê xebatan ameyî temamkerdene

Naturaparkî de ke aşma kanûne de viraştişê ci dest pêkerd, %55ê xebatan ameyî temamkerdene. Îmalatê binê rayîranê rayîrşîyayîş û bîsîkletan ê projeyî ameyî temamkerdene, amadekarîyê serî dewam kenê.

Waranê kay û fîtnesî û waranê peyzajê nebatî de xebatê teswîye, aks, aplîkasyon û rokerdişê herre dewam kenê. Xebatê mobîlyayanê şaristanî, grûbanê kayî û peyzajê nebatî yê projeyî zî do badê dîyarkerdişê aksan û kotanê serî dest pêbikerê.

Viraştişê awanîyan dewam keno

Naturaparkî de viraştişê çar WC û mescîdêk dewam keno. Beşê bingeyî yê binênî yê awanîyan ameyî temamkerdene, xebatê înşaatê xamî yê serawanîyan dewam kenê.

Golekanê bîyolojîkan de xebata drenajî

Di golekanê bîyolojîkan de ke projeyî de ca gênê, xebatî dewam kenê. Betonê perdeyî yê golekanê bîyolojîkan ameyî temamkerdene, xebatê drenajî dewam kenê. Parke de ke cayê hewzanê klasîk, biklor û zaf enerjî xerckerdoxan de golekê bîyolojîkî yê tebîet reyde ahengin ameyî tercîhkerdene, hem piştîdayîşê ekosîstemî hem zî teserûfê enerjî yeno amanckerdene.

Xebatê binawanî dewam kenê

Naturaparkî de çarçewaya xebatanê binawanî de kendişê bingeyî, xetê drenajê awa varanî, binawanîya elektrîkî û muameleyê seba sîstemanê awedayîşî yenê ramitene. Projeyî de ke cayêko muhîm ê şaristanî de ca gêno, badê xebatanê binawanî do îmalatê serawanî dewam bikerê.

Goleka bîyolojîke û dîzayno bêasteng vejîyenê ver

Naturapark ke goleka bîyolojîke ra teber dîzayno bêasteng zî tede vejîyeno ver, bi fehmêko resayox û bêasteng ke tena seba gedeyan ney, seba bikarardişê heme hemwelatîyan munasîb o, yeno dîzaynkerdene. Yeno amanckerdene ke proje bi nê hetê xo seba fehmê şaredarîya komelkî bibo nimûneyêko muhîm.

Nebatê mewcûdî do bêrê pawitene

Cayê pakkerdişê temamê warî de ke projeyanê girdan de zaf yeno dîyene, Naturaparkî de nêzdîbîyayîşêko ekolojîk ame qebûlkerdene. Çarçewaya projeyî de darê mewcûdî do bêrê pawitene, bi nebatanê neweyan ke do bêrê war, keskîya ci do bêra dewlemendkerdene.

Rayîrê bîsîklet û rayîrşîyayîşî do bêrê viraştene

Naturaparkî de bi amancê teşwîqkerdişê cuya biweşîye do rayîrê bîsîklet û rayîrşîyayîşî bêrê viraştene. Bi hacetanê fîtnesî ke do rayîranê rayîrşîyayîşî ser o bêrê ronayene, do sporkerdişê hemwelatîyan rê piştî bêro dayene.

Projeyî de ancî do warê kay û fîtnesî, warê roniştişî, warê çalakîyanê serbestan, çar WC, mescîdêk û aksê gêrayîşî ca bigîrê.