Yeno amanckerdene ke waro ke vernîya problemanê qilêrîya dorûverî, adir, dû û boye tede ameye girewtene, bibo warêko kesk ke şarê Pîranî bieşko tede boya xo bigîro.

Waro 15 serrî 3 rojan de ame rehabîlîtekerdene

Ekîbê Serekîya Daîreya Pawitiş û Kontrolê Dorûverî û Şaredarîya Pîranî, warê çopan de ke sînoranê Taxa 15ê Temmuze de yo, xebatêka rehabîlîtasyonî ya hîraye ya 3 rojan ramite. Warî de ke herêmanê roniştişî yê neweyan de sebebê problemanê adir, dû û boye bî, xebatê pakî û serûberkerdişî ameyî temamkerdene. Badê îslahkerdişê warê çopan ê Gêlî, bi xebatanê ke Pîran de zî ameyî ramitene, depokerdişê wehşî yê çopan o ke teqrîben 15 serrî yo dewam kerdêne, qedîya.

Çopî do bêrê berdene Tesîsê EKAY’î yê Qeredaxî

Bi sîstemo newe, çopê huşkî yê ke qezaya Pîranî ra yenê arêdayene, êdî warê mewcûdî de nêyenê depokerdene. Çopê keyeyan ke seranserê qeza de yenê arêdayene, do verê Îstasyonê Neqilkerdişî yê Erxenî, dima zî Tesîsê Çopê Huşkî yo Entegre yê Qeredaxî (EKAY) bêrê neqilkerdene û bê ke zirar bidê dorûverî, bêrê bertarafkerdene.

'Amancê ma kêmîkerdişê dewsa karbonî yo'

Mudirê Şûbeyê Çopê Huşkî yê Serekîya Daîreya Pawitiş û Kontrolê Dorûverî Mehmet Baranî, derheqê rehabîlîtasyonê warî de agahî daye û va: "Goreyê qiseykerdişanê ke Şaredarîya ma ya Pîranî reyde ameyî kerdene, seba rehabîlîtasyonê warî ma bi wesayît, hacet û personelanê xo ameyî war. Badê xebata hîrê rojan ma warî de rehabîlîtasyonêko cidî viraşt. Naye ra dima çopî do hetê Şaredarîya ma ya Pîranî û Şaredarîya ma ya Şaristanê Girdî ra bi hewayo biserûber bêrê berdene Îstasyonê Neqilkerdişî yê Erxenî, uca ra zî Tesîsê EKAY’î. Badê warê Gêlî ma tîya zî bi temamî rehabîlîte kerd. Amancê ma kêmîkerdişê dewsa karbonî û akerdişê nê warê çopan o teqrîben 15 serrî yo warêko kesk ke şarê Pîranî bieşko tede boya xo bigîro."

Waro mewcûd do bibo parke

Hetkarê Hemşaredarî yê Şaredarîya Pîranî Ahmet Akcevîzî zî bal ante muhîmîya xebata hempare ya seba qeza ser o û va: "Warê ke verê Taxa 15ê Temmuze de sey warê arêdayîşê çopan ameyêne xebitnayene, ma bi hemparîya şaredarîya xo û Şaredarîya Amedî ya Şaristanê Girdî rehabîlîte kerd. Naye ra dima ma çopanê xo do berê Îstasyonê Neqilkerdişî yê Erxenî. No war êdî sey warê çopan nêyeno xebitnayene, do sey parke pêşkêşê xizmetê hemwelatîyan bibo."