Rojanê Gastronomî dest pêkerd
Rojê Gastronomî ke bi amancê daşinasnayîşê kulturê mitbaxe yo kokdar û tehmanê herêmkîyan ê Amedî yenê organîzekerdiş, bi atolyeya viraştişê tirşîya lakto-fermentekerdîye dest pêkerd ke Qonaxê Cemîl Paşayî de bî. Atolyeyan de ke do mabênê tarîxanê 19ê êlule – 4ê teşrîna verêne de cayanê tarîxî û kulturîyan ê şaristanî de bêrê kerdiş, fermantasyonî ra heta mîrê tirşî, mitbaxa bêeşte ra heta şerbetanê herêmkîyan sernameyê cîyayî do bêrê viraştiş.
Rojê Gastronomî ke hetê Mudirîya Şûbeyê Gastronomî û Markabîyayîşî ra yenê organîzekerdiş ke binê banê Serekîya Daîreya Kultur, Huner û Karanê Komelkîyan de ya, dest pêkerd. Atolyeya yewine ya çalakîyan Qonaxê Cemîl Paşayî de derheqê viraştişê tirşîya lakto-fermentekerdîye de ameye kerdiş.
Atolye de ke Funda Akinci rayberîya ci kerde, beşdaran rê qonaxê amadekerdişê tirşîya lakto-fermentekerdîye, metodê ke yenê xebitnayîş û çîyê muhîmî yê viraştişê tirşî ameyî îzahkerdiş.
Vîrê mitbaxe yê şaristanî do bireso atolyeyan
Çarçewaya Rojanê Gastronomî de ke do heta 4ê teşrîna verêne dewam bikerê, cayanê tarîxî û kulturîyan ê cîyayan ê Amedî de atolyeyê cîyayî do bêrê organîzekerdiş. Çalakîyan de metodê amadekerdiş û pawitişî yê tradîsyonelî zî do bêrê viraştiş ke kulturê mitbaxe yê şaristanî virazenê.
Çarçewaya bernameyî de sernameyanê fermantasyon, mîro tirş, mitbaxa bêeşte û şerbetanê herêmkîyan de do xebatî bêrê kerdiş.
Berhemê herêmkîyî û şeklê berhemardişî yê tradîsyonelî do bêrê daşinasnayîş
Bi çalakîyan yeno amanckerdiş ke berhemê herêmkîyî û şeklê berhemardişî yê tradîsyonelî ke vîrê mitbaxa Amedî de cayêkê înan o muhîm est o, bêrê daşinasnayîş. Bi rayîrê Rojanê Gastronomî yeno amanckerdiş ke kulturê mitbaxe yê şaristanî bêro qeydkerdiş, bêro gandarkerdiş û neslanê ameyoxan rê bêro resnayîş.
Çarnayox: Mehmet Olmez
