Şaredarîya Şaristanê Girdî dewam kena ke qezayan de binawanîya resî xurt bikera û hemwelatîyan rê resêko biemnîyet û rehet temîn bikera. Na çarçewa de Cadeyê Akpinarî yê Taxa Akpinarî de dest bi rokerdişê asfaltê germî bî.

Warêko 6 hezar metrekareyî de xebata asfaltî

Amadekarîyanê binawanîye ra pey ke bi koordînasyonê Şaredarîya Bismilî ameyî kerdiş, ekîbê Şaredarîya Şaristanê Girdî warêko 6 hezar metrekareyî de asfaltê germî rokenê. Bi xebate yeno amanckerdiş ke rîyê cadeyî hîna pêt bibo û resê wesayîtan hîna biemnîyet bibo.

Rastkerdişê peyarayîran ê hezar û 750 metrekareyî

Asfaltî ra teber cadeyî ser o warêko hezar û 750 metrekareyî de xebatê rastkerdişê peyarayîran dewam kenê. Yeno amanckerdiş ke badê temambîyayîşê xebatan trafîkê wesayîtan hîna biserûber bo û resê peyayan asan bibo.

Hemşaredaranê Bismilî xebatî etud kerdî

Hemşaredarê Şaredarîya Bismilî Mizgîn Ekîn û Guven Tanrikuluyî xebatê Cadeyê Akpinarî cayê xo de etud kerdî. Hemşaredaran dîyar kerd ke do goreyê waştişanê hemwelatîyan xizmet bidê û waşt ke cadeyo newe şarê taxe rê xeyrên bo.

Muxtarê Taxa Akpinarî Erkan Ayazî zî memnûnîya xo îfade kerd û vat: “Na xebata asfaltî taxa ma rê xeyrên bo. No şar her çî heq keno. Ma seba xebatanê asfaltî hemşaredaranê şaredarîye rê sipas kenê.”

Çarnayox: Mehmet Olmez