Şaredarîya Amedî ya Şarsitanê Girdî, bi şîarê “Bi Hezaran Daran Amedo Kesk” Parka Şaristanî ya Mezopotamya de aktîvîteyê ronayîşê şitilan organîze kerd.

Xebatê parka 211 hezar û 656 metrekareyî resayî peynîye. Hemşaredare Serra Bucak, Sekreterê Pêroyî Serdar Bakiroglu, serekê daîreyan, temsîlkarê rêxistinanê ekolojî û komelê sîvîlî, ciwan û gedeyî beşdarê aktîvîteyî bîyî.

Qonaxa verêne de 117 şitilî resayî herre.

Çarçewaya xebatanê keskkerdişî de ke seranserê şaristanî de do dewam bikerê, yeno plankerdiş ke bi pêroyî 20 hezar şitilî bêrê ronayîş: Parka Şaristanî ya Mezopotamya de 8 hezar, Naturaparke de 5 hezar, Bulwarê Gaffar Okanî de 3 hezar, warê goristanê neweyî de 2 hezar û cayanê cîyayan ê şaristanî de 2 hezar.

Hemşaredara Şaredarîya Amedî ya Şarsitanê Girdî Bucak bi vatişê “Wa gan bido ganê ma, awe bido herra ma” dîyar kerd ke xebatî do zerrîwaz, aktîvîstê ekolojî, gede, ciwan û wendekaranê unîversîte reyde pîya bêrê pîlkerdiş.