Seba zazakî termînolojîya muzîkî ya hempare yena viraştene
Şaredarîya Amedî ya Şaristanê Girdî, bi amancê ke termanê zazakî yê muzîkî arê bido, çekuyanê mewcûdan bierjno û înan bikero hempar, mabênê tarîxanê 3-6ê êlule de bi beşdarîya ziwannas, akademîsyen û cigêrayoxanê warî komxebate organîze kena.
Kombîyayîşo ke hetê Mudirîya Şûbeyê Pawitiş û Averberdişê Ziwanan a Serekîya Daîreya Kultur, Huner û Karanê Komelkîyan ra yeno organîzekerdene, bi sernameyê "Termînolojîya Şaredarîye ya Zafziwane – Termê Muzîkî yê Zazakî I" yeno viraştene.
30 kesî beşdarê komxebate bîyî
Ziwannas, akademîsyen û cigêrayoxê warî yê ke endamê Grûba Xebate ya Vateyî yê, beşdarê kombîyayîşî bîyî. Komxebate de termê zazakî yê muzîkî do tede bêrê muzakerekerdene û 30 kesî ca gênê.
Xezîneya çekuyanê zazakî do bêro qeydkerdene
Mudirê Şûbeyê Pawitiş û Averberdişê Ziwanî Tahîr Baykuşakî dîyar kerd ke amancê kombîyayîşî arêdayîşê termanê muzîkî yê zazakî, erjnayîş çekuyanê mewcûdan û viraştişê termînolojîyêka hempar o.
Baykuşakî îfade kerd ke seba qeydkerdişê xezîneya çekuyanê zazakî ke mîyanê ziwananê binê talûkeyî de ca gêno û seba neqlkerdişê înan ê neslanê ameyoxan, xebatê termînolojîye muhîm ê.
