Sempozyûmê vîrê komelî û travma dest pêkerd
Hemşaredara Şaredarîya Amedî ya Şaristanê Girdî Serra Bucak akerdişê Sempozyûmê “Heqê Qiseykerdişî: Vîrê Komelî, Şahîdîye û Travma” de qisey kerd ke tede vîrê komelî, vindîkerdişê bi zor, şîne, travmaya mabênê neslan û prosesê weşbîyayîşî ameyî qiseykerdiş. Bucake vat: “Ewro ma do qalê birînan bikerê ke vîyarteyî de nêmendê û nêameyê kerdiş”; bale ante ser o ke weşbîyayîş meseleyêka şexsî nîya, kolektîf û komelkî ya.
Sempozyûm ke hetê Şaredarîya Şaristanê Girdî û Komeleya Xebatanê Travmayî ra ame organîzekerdiş, Salona Konferansî ya Alî Emîrî de dest pêkerd. Hemşaredarê Şaredarîya Şaristanê Girdî Serra Bucak û Emîn Ay, Hemşaredaro verên ê Şaredarîya Şaristanê Girdî Adnan Selçuk Mizrakli, endamê meclîsî, Hetkarê Sekreterê Pêroyî Zerin Turk û Muhabbet Erdogmuş, akademîsyenî û pisporanê warê psîkîyatrî sempozyûmî de ca girewt.
Hemşaredare Bucak: Ma do qalê birînanê ke nêameyê kerdiş bikerê
Bucake dîyar kerd ke vîrê komelî yê Amedî tena kitab û arşîvan de ney; taxan, kuçeyan û bedenan, zîhnan û hîsanê merdiman de ciwîyeno û rêçeyê koçê mecbûrî, vindîbîyayîş, çinhesibnayîş, şîne û pawitişî hema dewam kenê.
'Weşbîyayîş meseleyêka şexsî nîya, komelkî ya'
Bucake bale ante ser o ke travma tena sey rewşêka ruhîye ya şexsî nêna erjnayîş; tesîrê vindîkerdişê bi zor, koçberkerdiş, tedayanê serê ziwanî û polîtîkayanê komelkîyan têkilîyanê keye û komelî de bi neslan dewam kenê. Bucake vat ke şahîdîye tena qalkerdişê ê çîyan nîya ke ciwîyayê; eynî wext de waştişê qebulkerdişê raştîya yew tecrubeyî ya.
Xebatê vîr û travmayî parçeyêkê berpirsîyarîya îdareyê herêmkî yê
Bucake dîyar kerd ke sey Şaredarîya Şaristanê Girdî xebatanê vîr û travmayî sey parçeyêkê berpirsîyarîya îdareyê herêmkî vînenê; merkezê piştîdayîşê psîkokomelkî yê ke bingeyê komelî ser o yê, zafziwanî yê, nimitîye pawenê û bê şertê teşxîs yan belgeyî muracat yeno kerdiş, ameyî plankerdiş. Bucake qalî kerd ke Meydanê Abîdeyî yê 5ê Hezîrane, rayîrê vîrî, xebatê vîrî yê Sûrî, hemkarîya Merkezê Vîrî û Pêdîyayîşê Aştî yê Amedî nê xebatan ra yê. Bucake vat: “Kes mecbûr nêbeno ke qal bikero yan bîyaro vîrî. Heqê qiseykerdişî hertim yê merdiman bi xo yo. Ma sey îdareyanê herêmkîyan do tîya de bibê ke piştî bidê na prosesî.”
Sereka Heyetê Îdareyî ya Komeleya Xebatanê Travmayî Nergis Ozdemîr Eke zî dîyar kerd ke ameyî têhet ke pîya bifikirîyê, goş bidê yewbînan û heqê qiseykerdişî bigîrê.
Roniştişê verênî de ziwan, nasname û travmaya mabênê neslan ame qiseykerdiş
Roniştişê verênî de ke bi moderatorîya sosyologe Dr. Ronahî Onene bî, psîkolog Sîyabend Aslan, psîkîyatrîst û nuştox Azad Gonderci û Dr. Jan Îlhan Kizilhanî pêşkêşîyê xo dayî. Roje de roniştişê bînî zî do bêrê kerdiş; amanc o yo ke doneyê nê roniştişan piştî bidê merkezê piştîdayîşê psîkokomelkî ke Şaredarîya Şaristanê Girdî do nêzdî de akero û xebatanê vîrê şaristanî û hemwelatîyanê ke cayê xo ra bîyî.
