Şaredarîya Amedî ya Şaristanê Girdî, bi amancê pawitişê Sûranê Amedî yê Tarîxîyan ke sembolanê tewr muhîman ê şaristanî ra yew ê û vernîgirewtişê qilêrîya dorûverî, xebatanê xo dewam kena. Ekîbê ke binê banê Serekîya Daîreya Pawitiş û Kontrolê Dorûverî de ameyî awankerdene, bê ke zirar bidê awanîya tarîxîye, warî de xebatêka pakîye ya xurte ramenê.

Her cayê sûran bidiqet yeno pakkerdene

Ekîbî ke cayanê cîyayan ê sûran de eynî wextî de falîyetan ramenê, çopê ke binê sûran de arê benê û sebebê qilêrîya dîmenî yê, wedarnenê. Vîyartgeh û galerîyan de ke qismanê zereyî yê sûran de yê, tort û çopê ke arê bîyê û bi diqet yenê pakkerdene; qismanê corênan de zî vera qilêrîya ke wextî mîyan de virazîyaya, xebatêka hesase yena kerdene.

Bi xebatanê ke bê ke zirar bidê sûranê tarîxîyan yenê ramitene, yeno amanckerdene ke hem turîstanê herêmî û teberî rê dorûverêko hîna pak bêro pêşkêşkerdene hem zî wayîrî bi mîrasê tarîxî yê şaristanî bêro vetene.

'Ma do 7/24 sûranê xo pak bigîrê'

Mudirê Şûbeyê Eşteyê Huşkî yê Serekîya Daîreya Pawitiş û Kontrolê Dorûverî Mehmet Baranî dîyar kerd ke xebatê pakîye çarçewaya kampanyaya "Ez Amedî ra hes kena, leymin nêkena" de yenê ramitene û vat: "Ma galerîyanê sûran û serê bedenanê sûran de ke merkezanê tewr muhîman ra yew ê û tedeyîyê tarîxî yê Amedî yê, falîyetê pakîye ramitî. Pakîya sûranê ma, kuçeyanê Sûrî û cayanê ma yê tarîxîyan senîn a, ganî pakîya beden û galerîyanê sûran, serê înan û zereyê înan zî wina bo. Ma şarê xo ra wazenê ke bi taybetî vera cayanê tarîxîyan hîna hesas bê û nê waran nêkerê qilêrin. Hem seba şaristanê ma hem zî seba turîstanê herême û teberî, ma do 7/24 sûranê xo pak verdê."

Şaredarîya Şaristanê Girdî do seranserê şaristanî de waranê tarîxî û kulturîyan de xebatanê pakî û miqateyî bi hewayo perîyodîk dewam bikera.