Tîyatroyê Şaristanî teşrîna peyêne de bi 8 kayan reseno temaşekerdoxan
Tîyatroyê Şaristanî yê Şaredarîya Amedî ya Şaristanê Girdî teşrîna peyêne de bi kayanê gedeyan, kayanê mêmanan û kayanê repertuwarê xo reseno temaşekerdoxan. Çarçewaya bernameyî de prêmîyerê kayê gedeyan ê bi nameyê “Serpêhatiyên Nîkoyê Şilbik” zî do bêro kerdiş.
Tîyatroyê Şaristanî yê Şaredarîya Amedî ya Şaristanê Girdî (DBŞT) bernameyê aşma teşrîna peyêne eşkera kerd. Nawitişê bernameyî do Merkezê Kultur û Kongre yê Çand Amedî de Salona Tîyatroyî ya M. Emîn Yalçinkaya de bêrê kerdiş ke tede seba gede û pîlan kayê cîya-cîyayî est ê. “Destana Moraşînê” zî do salona girde de bêro kaykerdiş.
Bernameyê teşrîna peyêne bi kayê gedeyan dest pêkerd
Nawitişo verên ê aşme 1ê teşrîna peyêne de saete 13.00 de bi kayê gedeyan ê “Hişê Min Tev Li Hev Bû” bî. Bername do 6 û 7ê teşrîna peyêne de saete 19.30 de bi “Jîn” dewam bikero. Temaşekerdoxê qijî zî eşkenê 8ê teşrîna peyêne de saete 13.00 de kayê “Keçelok” temaşe bikerê.
Di kayê mêmanan do bêrê kaykerdiş
“Medea” do 13ê teşrîna peyêne de, “Zembîlfiroş” zî do 14ê teşrîna peyêne de saete 19.30 de biresê hezkerdoxanê tîyatroyî. “Xewna Şeveke Havînê” ya repertuwarê DBŞTyî zî do 20 û 21ê teşrîna peyêne de saete 19.30 de bêra kaykerdiş.
Prêmîyerê kayê gedeyan 22ê teşrîna peyêne de yo
Kayê gedeyan ê “Serpêhatiyên Nîkoyê Şilbik” do 22ê teşrîna peyêne de saete 13.00 de prêmîyerê xo bikero û 29ê teşrîna peyêne de eynî saete de reyna biresso gedeyan. “Destana Moraşînê” zî do 23ê teşrîna peyêne de saete 19.30 de salona girde de bêra kaykerdiş.
Çarnayox: Mehmet Olmez
