Şaredarîya Amedî ya Şaristanê Girdî badê dûrîkerdişê awa ke rîyê varanê zafî ra cade û bulwaran de pêser bîbî, qezayanê Rezan, Peyas, Sûr û Bajaro Newe de dest bi xebata pakkerdişî kerd. Ekîbê ke pîya xebitîyenê, çop û çamir pak kenê ke izxarayanê xetanê awa varanî de pêser bîyê.

Şaredarîya Şaristanê Girdî mudaxeleyanê xo yê awa pêserbîyayîye û aweeştişan bi xebatanê pakkerdişî dewam kena. Ekîbê ke roje de çatrayîr, cade û bulwaran ra awe vete, cayan de ke vetişê awe qedêyayo, dest bi pakkerdişê eşteyan kerd. Ekîbê Mudirîya Pêroyî ya DÎSKÎ û serekîyanê daîreyanê Pawitişê Dorûverî, Weşîye û Park û Baxçeyan çar qezayanê merkezî de pîya xebitîyenê.

Çop û çamira izxarayan yenê pakkerdiş

Qezayanê Rezan, Peyas, Sûr û Bajaro Newe de pakkerdişê cade û bulwaran reyde izxarayê xetanê awa varanî zî yenê pakkerdiş. Ekîbî çop û herrîyan pak kenê ke vernîya herikîyayîşê awe gênê û vetişê awa varanî asan kenê. Bi na xebate amanc o yo ke tesîrê nêweşî yê varanî yê serê cuya rojaneyî hewa bibê.