Serekîya Daîreya Çapemenî, Weşan û Têkilîyanê Şarî, xebatanê xo yê seba cayê xo de tesbîtkerdişê probleman û hemwelatîyan reyde ronayîşê têkilîya rasteraste, merkezê şaristanî û taxanê dewan de dewam kena.

Yewîna Ca de Çarekerdişî hezar û 659 muracatî girewtî

Yewîna Ca de Çarekerdişî, aşmanê hezîrane, temmuze û tebaxe de bi xebatanê warî û muracatanê rasterastan hezar û 659 waştişî girewtî. Ekîban taxe, sîte, park, cade, cayê karî û warê dewan zîyaret kerdî û waştiş, pêşnîyaz û gazinê hemwelatîyan cayê xo de goşdarî kerdî.

Çarçewaya xebata "Vatiş Şima ra" de zaf cayan de standî ameyî ronayîş; parkanê Koşuyolu, Ayşe Şan, Korhat, Roboskî, Abîde, Hz. Suleyman, Park 75, Kardeşlik, Hîntlî Baba, Anzele, Newroz û Halîl Îbrahîm Oruçî zî nînan mîyan de bîyî. Waştişê ke sindoqan de ameybî verdayîş, ameyî qeydkerdiş û serekîyanê daîreyanê têkilîdaran rê ameyî resnayîş.

Problemî cayê xo de ameyî tesbîtkerdiş

Ekîbanê Mobîlî yê Gêrayoxan zaf taxe û herêman de xebata warî kerde; Peyas, Fabrîka, Başîl, Yolboyu, Yîgîtçavuş, Kuça, Talaytepe, Selahattîn Eyyubî, Karaçalî, Uçkuyular, Cadeyê Mûsa Anterî, Îskenderpaşa, Fatih û Korhat zî nînan mîyan de bîyî.

Xebatan de rayîr û peyarayîrê hermîyayeyî, kombîyayîşê çop û harfîyatî, xirabîyê xeta awa şimitişî, hewceyîya dermankerdişî û problemê pakîya cugehî ameyî tesbîtkerdiş. Problemî seba çareyî serekîyanê daîreyanê têkilîdaran, DÎSKÎ û şaredarîyanê qezayan rê ameyî resnayîş. Taxa Muratçikî de Rayîrê Grûba Dêrika Kehene ser o, waştişnameyê hemwelatîyan ser o xebata miqate û tamîrî ame kerdiş.

Karkerê citkarîye yê demserre ke taxanê dewan de xebitîyenê zî ameyî zîyaretkerdiş; şertê xebate, hewceyîyî û pêşnîyazê înan ameyî goşdarîkerdiş û kedkaran rê awe û şewqa ameyî vilakerdiş.

Sindoqa Sanikan resaye taxanê dewan

Çarçewaya Projeya Sindoqa Sanikan de wendekaranê dibistananê bingeyînan ê taxanê Bahçecik û Hamuryazanî yê qezaya Sûrî û taxanê Hantepe, Guzelkoy, Bozek û Dokmetaşî yê qezaya Yenîşehîrî rê kitabî ameyî vilakerdiş.

Hîrê aşman de 70 hezar û 641 vengdayîşî bîyî muracat

Aşma hezîrane de 62 hezar û 451 vengdayîşî resayî Merkezê Vengdayîşî yê ALO 153î; nînan ra 28 hezar û 550 bîyî muracat. Aşma temmuze de 58 hezar û 523 vengdayîşî ameyî girewtiş, 25 hezar û 966ê ci; mabênê 1-26ê tebaxe de 44 hezar û 224 vengdayîşî ameyî girewtiş, 16 hezar û 125 ê ci sey muracatî ameyî qeydkerdiş.

Demê xebate de ALO 153î rê bi tirkî 151 hezar û 953, bi kurmanckî 12 hezar û 886 û bi zazakî 359 vengdayîşî resayî.

Hezar û 730 muracatê CÎMERî ameyî erjnayîş

Mudirîya Şûbeyê Têkilîyanê Şarî, bi pêroyî hezar û 730 muracatê ke Merkezê Têkilîye yê Serekomarîye ra ameybî, erjnayî. Muracatê ke pêşnîyaz, waştiş, gazin û sipaskerdişan ra virazîyayîbî, seba kerdişê muameleyanê lazimî yewînanê têkilîdaran rê ameyî resnayîş.