Hevşaredarên Bajarê Mezin ê Amedê Serra Bucak û Dogan Hatun, beşdarî çalakiya Aşûreyê ya ji aliyê Komeleya Çandê ya Pîr Sultan Abdal ve hat lidarxistin bûn. Hevşaredar Bucak diyar kir ku Cemxane ji bo Elewiyan îbadetxane ye, xwest ku Cemxane hê zêdetir bibe sedema aştî, xweşbînî û yekîtiyê.

Hevşaredarên Bajarê Mezin Serra Bucak û Dogan Hatun beşdarî çalakiya Aşûreyê ya ku ji aliyê Komeleya Çandê ya Pîr Sultan Abdal (PSAKD) Şaxa Amedê ve hat lidarxistin bûn. Di çalakiya ku şaredarên navçeyan, endamên meclîsê û endamên komeleyê amade bûn de Hevseroka Şaxa PSAKDê Ayfer Artan axivî û spasiya hemû kesên beşdarî çalakiya piştî fitarê bûn kir.

Hevşaredar Bucak: Nêzîkbûna bi ferqûcudayî didome

Hevşaredar Serra Bucak di çalakiyê de axivî û diyar kir ku baweriya Elewiyan baweriya aştî, yekîtî û xweşbîniyê ye û got, "Tevî ku li erdnîgariya ku em lê dijîn komkujî, biçûkxistin, vederkirin û paşguhkirina jiyana Elewiyan heta îro dewam dike jî, ew hê jî sembola xweşbînî û edaletê ye. Me bi gelek awayên cuda ev hemû hevaltiya vê baweriyê jiyane. Lewra em di vî warî de xwe bi şens dizanin."

'Zanîn famkirin e'

Bucak da zanîn ku 12 roj rojiya şînê heye û wiha got: “Lê belê li vî welatî çend kesan dizanibû ku ev rojiya şînê ye? Çend kesan dizanibû ku av li ser wan maseyan tune ye? Zanîn têgihiştin e. Ji bo têgihiştin, hevkarî, xweşbînî, ji bo avakirina aştiyê bi hev re." 

Bucak destnîşan kir ku Cemxane ji bo Elewiyan îbadetxane ne û xwest ku Cemxane li vê erdnîgariyê bibe sedema aştî, xweşbînî, yekîtî û hevgirtinê.

'Em ê di 23ê Tîrmehê de li gelek nuqteyên Aşûrayê çalakiyan li dar bixin'

Bucak destnîşan kir ku Şaredariya Bajarê Mezin û şaredariyên navçeyan wê 23ê Tîrmehê roja Sêşemê saet di 18.00ê de li gelek nuqteyên bajêr çalakiya Aşûreyê li dar bixin û got ku ew ê bi vê çalakiyê hevaltî, hevgirtin û baweriya xwe ya aştiyê bînin ziman. Bucak her kes vexwend çalakiya Aşûrayê ya ku ew ê li Koşuyolu, Dagkapi, Nexweşxaneya Perwerde û Lêkolînê ya Gazî Yaşargîl û Nexweşxaneya Dewletê ya Selahattîn Eyûbî pêk bînin.

Piştî merasîma cemê ya di çalakiyê de hat lidarxistin, li welatiyan aşûre hat belavkirin.