Hevşaredarên Bajarê Mezin ê Amedê Serra Bucak û Dogan Hatun, beşdarî merasîma kupayê ya ku ji aliyê ASKFê ve hat lidarxistin bûn. Hevşaredar Hatun diyar kir ku ew ê di nava 5 salan de ji bo pêşeroja zarok û ciwanan di hemû şaxên sporê de bixebitin.
Federasyona Klûbên Sporê yên Amator (ASKF) ji bo klûbên ku di sezona futbola amator a 2023-2024an de bûn şampiyon û derketin lîgên jor, merasîma kupayê li dar xist. Di merasima li Navenda Çand û Kongreyê ya ÇandAmedê de Hevşaredarên Bajarê Mezin ê Amedê Serra Bucak û Dogan Hatun, Hevşaredarên Sûrê Fatma Gulan Onkol û Adnan Orhan, Hevşaredarê Yenîşehîrê Mehmet Ergûn, Alîkarê Sekreterê Giştî yê Şaredariya Bajarê Mezin Reşat Bakan, Serokê ASKFê Remzî Dayan û werzişvan beşdar bûn.
'Serok bi hemû hêza xwe tevdigerin, em ê berdêlên xwe bi dest bixin'
Serokê ASKF'ê Remzî Dayan jî ku axaftina vekirinê ya merasîmê kir, got ku pirsgirêkên di lîgên amatorî de bi dawî nebûne û weha axivî, "Her çendî ku em yek ji kêm metropolên welêt in jî, mixabin derfetên me zêde tune ne. Şaredariyên Şaredariya Bajarê Mezin bi hemû hêza xwe piştgiriya me dikin, spas ji bo we, em ê encamên vê yekê bigrin."
Hevşaredar Hatun: Em ê li gorî hêza xwe gavan biavêjin
Di merasîmê de Hevşaredar Dogan Hatun axivî û diyar kir ku ew ji bo merasîma kupayê ya AKSF'ê hatin cem hev û serkeftina ciwanan pîroz kir. Hatun, anî ziman ku di Plana Stratejîk a 5 salan de hemû kêmasiyên şaxên werzîşê hatine nîqaşkirin û got, “Helbet budçeyeke me ya bêsînor nîne. Bi budceya xwe ya kêm em ê li gorî hêza xwe gavan biavêjin, lê me hewl daye ku di xaleke ku hinekî li derveyî hêza me ye de gavan bavêjin.”
'Em nûkirin û çakkirina hemû tesîsan dikin'
Hatun bal kişand ku ew ji ber nebûna tesîseke werzîşê ya ku bigihêje asta qada navneteweyî û Olîmpiyatên Amedê bi fikar in û destnîşan kir ku wan ji Wezareta Hawirdor, Bajarvanî û Guhertina Avhewayê erdek ku girêdayî Emlakên Neteweyî ye xwestiye. lê daxwazên wan hatin redkirin. Hatun, anî ziman ku tevî vê biryarê jî ewan li ber xwe daye û li taxan û hemû tesîsên girêdayê bajarê mezin temîr û nûkirina stadan û kortên tenîsê pêk tînin û got ku ew amadekariya komplekseke mezin a sporê dikin. Projeya ji bo tesîsên Seyrantepe Şilbe bi giştî, danûstendinên wan bi walîtiyê re didomin û eger walîtî qebûl bike wê tesîsa binesaziyê biqede.
'Em soza xebatê didin'
Hatun anî ziman ku ew dixwazin di şaxên werzîşê yên din de jî amadekariyên ku dê binesaziyê xurt bike bikin û wiha got: “Di rêveberiyên berê de salonên werzîşê yên Şaredariya Bajarê Mezin radestî saziyên din hatin kirin û bi rastî jî kêmasî gelek in. Pirsgirêkên tesîsên şaredariyên bajar û navçeyan hene ku dê ji ciwanan re bibe alîkar ku binesaziyê biguherînin. Li ser vê yekê me dest bi hevdîtinên xwe kir. Me plansaziyeke stratejîk a 5 salan amade kir ku li cihekî ku em karibin avahîyên xwe paşve vegerînin, xizmetê ji civakê re bikin û di warê werzîşê de hemû kêmasiyan hel bikin. Lêgerîna me wê heta avakirina cihên nû bidome. Em dizanin ku ev bajar di hemû şaxên werzîşê de xwedî potansiyeleke mezin e. Dema ku Serokê Federasyona Futbolê ya Tirkiyeyê hat Amedê, me pê re sohbet kir, kêmasiyên di warê sporê de hatin vegotin, me ji bo tesîseke navneteweyî daxwaza destekê jê kir. Her wiha destnîşan kir ku 'em ê li gorî hêza xwe piştgiriyê bidin projeya ku hûn dixwazin pêk bînin'. Em li pêşberî we soz didin ku di van 5 salan de ne tenê di warê futbolê de di hemû şaxan de jî ji bo pêşeroja zarok û ciwanan xebatek bê kirin.”
Plaket pêşkêşî Hevşaredaran hatin kirin
Piştî axaftinan Serokê ASKFê Remzî Dayan ji bo destekkirina klûbên werzîşê yên amator plaket diyarî Hevşaredar Serra Bucak û Dogan Hatun kir.
Kupa ji tîman re hatin dayîn
Hevşaredar Bucak û Hatun kupa dan tîmên ku di lîgên amator de bûne şampiyon û derketine lîgên jor û di nav wan de “Diyarbekir Büyükşehir Belediyespor” jî heye.
