Li Festîvala Zarokan a Navneteweyî ya Xalîçeya Firinde ku ji aliyê Şaredariya Bajarê Mezin a Amedê ve hat lidarxistin, 37 hunermend ji 16 welatan beşdar bûn.

Festîvala Zarokan a Navneteweyî ya Xalîçeya Firinde ji aliyê Komeleya Huner Li Her Derê ve bi mêvandariya Serokatiya Daîreya Xizmetên Civakî hat lidarxistin. Li festîvalê ku li Qada Jiyana Hevpar a Sumerparkê hat lidarxistin, 37 hunermend ji 16 welatan beşdar bûn. Di festîvalê de çalakiyên curbecur wek xebatên atolyeyan, pêşandana kukleyan, konser, çîrokbêjî û hunerên destî hatin lidarxistin.

Zarok bi dilê xwe kêfxweş bûn

Di festîvalê de Atolyeya Kukleyên Bi Destan Çêkirî, Atolyeya Perkusyonê, Atolyeya Orîgamiya Japonî (Hunera qatkirina kaxezê), Atolyeya Çîrokbêjiya Dîjîtal, Atolyeya Sîrkê, Ezmûna Xalîçeya Firinde ya Rastiya Nîgaşî, Stenda Boyaxkirina Rûyan û pêşandanên Hunerên Şer ên Hindî ji aliyê zarokan ve baleke mezin kişande ser xwe.

Di çalakiyê de zarok, bi dilê xwe kêfxweş bûn û hem bi hunermendan re hem jî bi hevalên xwe re demên nayên jibîrkirin derbas kirin.

'Festîval bi beşdariya coş û kêfxweş a zarokan pêk hat'

Baran Bozboga, Xebatkarê Şaxa Zarokan a Serokatiya Daîreya Xizmetên Civakî, ku der barê çalakiyên festîvalê de agahî da, got ku festîval gelek rengîn derbas bû û zarokan bi coş kêfxweşî kir.

Bozboga got, "Di çarçoveya Festîvala Zarokan a Navneteweyî ya Xalîçeya Firrok de, atolyeyên me bi beşdariya dêûbavên me û zarokên me bi awayekî coş û kêfxweş dest pê kirin. Atolyeyên me di navberên diyarkirî de berdewam dikin. Çalakî dê heta konsereke mezin ku li Amfî Tiyatroyê were lidarxistin, berdewam bikin."