Hevşaredarên Bajarê Mezin ê Amedê Serra Bucak û Dogan Hatun, esnaf, gund û şaredariya navçeya Bismilê ziyaret kirin.

Hevşaredarên Bajarê Mezin Serra Bucak û Dogan Hatun, navenda navçeya Bismilê û taxên gundan ziyaret kirin. Rawestgeha yekem a Hevşaredaran Şaredariya Bismilê bû. Hevşaredarên ku ji aliyê Hevşaredarên Bismilê Mizgîn Ekîn û Guven Tanrikûlû ve hatin pêşwazîkirin, piştre derbasî avahiya xizmetê ya şaredariyê bûn. Hevşaredaran der barê xizmetên li navçeyê de agahî girtin û der barê xebatên ku bên kirin de bi Ekîn û Tanrikûlû re nêrînên xwe anîn ziman.

Serdana esnafan

Hevşaredar Bucak û Hatun piştî serdana Şaredariya Bismilê, esnafên Kolana Hunerê ziyaret kir. Hevşaredaran bi esnafan re sohbet kir û li daxwaz û pêşniyarên wan guhdarî kirin.

Hevşaredaran bi welatiyan re hevdîtin kirin

Piştre jî Hevşaredar derbasî gundê Mîrqulya û Şeqiltîzê bûn. Hevşaredaran ji ber rêya 800 metreyî ya ku li Navçeya Mîrquliyê xebatên binesaziyê didomin, gilî kirin û xwestin xebat bi lez û bez bên kirin.

Bîra avê di nav bernameya xizmetguzariyê de cih digire

Hevşaredar li Taxa Mîrquliyê derket pêş welatiyan û li daxwazên welatiyan ên der barê pirsgirêkên av û rê de guhdarî kirin. Hevşaredaran diyar kir ku ew ê bi tankeran pêdiviyên avê yên taxan bi cih bînin û diyar kirin ku ji bo çareseriya mayînde çêkirina bîrên avê dê di bernameya veberhênana sala 2025an de cih bigire.

Hevşaredaran solîna hilweşiyayî lêkolîn kir

Hevşaredaran solîna li ser Çemê Çelebiyan a li Taxa Şeqiltîzê ku di sala 2019an de ji ber barana zêde hilweşiya, lêkolîn kir û der barê solîn û rêyên alternatîf ên bên çêkirin de bi welatiyan re nêrînên xwe anîn ziman.

Di serdana esnaf û taxan a Hevşaredaran de, Hevşaredarên Bismilê Mizgîn Ekîn û Guven Tanrikulu, Alîkarê Midûrê Giştî yê Av û Kanalîzasyonê (DÎSKÎ) yê Amedê Serdar Arslan, Serokê Daîreya Koordînasyona Çêkirina Rê û Koordînasyona Binesaziyê Ozgur Tekîn, Serokê Daîreya 1.ya DÎSKÎyê Sûat Yildiz û endamên meclîsê jî amade bûn.