Şaredariya Bajarê Mezin a Amedê, di çarçoveya xebata veqetandina rûnê çêtirî yê bikaranî de, heta niha 4.5 ton rûnê darêtî berhev kiriye.

Di bin koordinasyona Serokatiya Daîreya Guherîna Avhewayê û Sifir Bermayî û Serokatiya Daîreya Parastina Jîngehê û Kontrolê de, xebatên ku li seranserê bajêr ji bo veqetandina bermahiyan li çavkaniyê hatine destpêkirin, berdewam dikin. Di çarçoveya protokoleke ku bi şirketeke bîlanskirî re hatiye îmzekirin de, ne tenê bermahiyên hişk, lê her wiha rûnê çêtirî yê bikaranî jî, ku zirarê dide jîngeh û tenduristiya mirovan, bi rêkûpêk tê berhevkirin.

Qonaxa duyemîn a xebatê

Berhevkirina rûnê bikaranî pêşî ji Aşxaneyê dest pê kir ku ji bo Xwaringehên Gel xwarin amade dike. Di qonaxa duyemîn a xebatê de, rûnê bikaranî ji kargehên li navenda bajêr û malan hat berhevkirin. Di çarçoveya xebatê de, broşur li malan, sîteyan û dikandaran hatin belavkirin û xebatên agahdarkirinê hatin kirin. Li sîteyên ku hejmara malan zêde ye, ji bo berhevkirina rûnê bikaranî bîdon hatin danîn.

Li hemberî 5 lître rûnê bikaranî 1 lître rûnê nû diyarî

Şaredariya Bajarê Mezin, bi şaredariyên navçeyan re derbarê berhevkirina rûnê çêtirî yê bikaranî de koordinasyon ava kir û bingeheke ji bo çawaniya berhevkirina rûnan ava kir. Li herêmên ku di nav sînorên Şaredariya Kayapinar û Baxlarê de dimînin û bi taybetî jî bi hevkariya şaredariyên navçeyên din, li herêmên diyarkirî bîdonên rûnê bikaranî hatin danîn. Ji bo pêşxistina hişmendiyê, di çarçoveya kampanyayê de ji xwediyên kargehan û welatiyên ku 5 lître rûnê bikaranî tînin re 1 lître rûnê nû tê dayîn.

Lêkolîna li cih hat kirin

Ev xebat ji aliyê Seroka Daîreya Avhewa û Sifir Bermayî Evin Dinar û Endazyara Jîngehê Zuheyla Aydin Balik ve li cih hat lêkolîn kirin.

Di çarçoveya xebatê de pêşî ji saloneke taştêyê ya li Kolana 75'an rûnê bikaranî hat berhevkirin. Seroka Daîreyê Evin Dinar û tîmên şirketa veqetandinê, dema rûnê çêtirî yê bikaranî ji herêmê distînin, derbarê xebatê de agahî dan. Rawestgeha din jî mala mamosteyê Gulsum Duymuş bû. Duymuş, ku 10 lître rûnê bikaranî radestî tîmên şirketê kir, ji ber vê xizmetê spasiya şaredariyê kir.

'Projeyek e ku bandorê li pêşeroja zarokên me dike'

Duymuş, ku balê dikişîne ser girîngiya hişmendiya jîngehê ya gel û berhevkirina bi vî awayî ya rûnê bikaranî, wiha got: "Ev jîngeh ya me ye di dawiyê de. Ev projeyek e ku bandorê li pêşeroja zarokên me dike, ji ber vê yekê ez ji hemû gelê me hêvî dikim ku hişmend bin. Ez dixwazim ku rûnên berhevkirî bên radestî şaredariyan kirin."

Bangawaziya berfirehkirina xebatê

Duymuş, ku anî ziman ku ew ji salên dirêj ve rûnê bikaranî berhev dike û dide şirketeke veqetandinê, got ku piştî vê xebata Şaredariya Bajarê Mezin, êdî dê rûnan bide şaredariyê. Duymuş, bi bangawaziya berhevkirina pîl, cam û bermahiyên plastîk jî, got: "Em dixwazin şaredariyên me di vê mijarê de xebatan bikin. Ev bermahî jî zirarê didin jîngehê."

'Xebateke pir rind e'

Fatma Gokdemir, xwendekara zanîngehê ku li Taxa Huzurevlerî dijî, got ku wan bihîstiye ku li hemberî 5 lître rûnê bikaranî 1 lître rûnê nû tê dayîn û piştî vê kampanyayê dest bi berhevkirina rûnê bikaranî kirine. Gokdemir, ku balê dikişîne ser ku lîtreyek rûnê bikaranî hezar metrekup avê qirêj dike, wiha axivî: "Ev hejmarek pir pir mezin e û em jî ji bo ku rûnê bikaranî xwezaya me qirêj neke kom dikin. Me bihîst ku bi rêya şaredariyê rûnê bikaranî tê veqetandin, piştre em bi şaredariyê re ketin têkiliyê. Rûnê bikaranî ji ber deriyê me hat girtin û li hemberî 5 lître rûnê bikaranî, 1 lître rûnê paqij hat dayîn. Kampanyayek xweş e; em hêvî dikin ku welatiyên me eleqedar bibin û rûnê bikaranî nerijînin lavaboyan. Em spasiya şaredariya xwe dikin."

Di çarçoveya xebatê de dawî ji maleke li Taxa Gaziyan rûnê bikaranî hat berhevkirin.

4.5 ton rûnê bikaranî hat berhevkirin

Di demekê de ku xebatên şaredariyê yên di vê çarçoveyê de berdewam dikin, heta niha di çarçoveya serîlêdanên li şaredariyê de 4.5 ton rûnê bikaranî hat berhevkirin û ji bo ku bi rêbazên guncav bê jinavbirin radestî şirketa veqetandinê hat kirin.