Hevşaredara Şaredariya Bajarê Mezin a Amedê Serra Bucak, beşdarî çalakiya ku Şaredariya Erxeniyê lidarxistî bû û got, "Em 8ê Adarê pêşkêşî dayikên xwe bikin".

Şaredariya Erxeniyê, ji bo 8ê Adarê Roja Jinên Karker ên Cîhanê konserek li dar xist. Li çalakiya ku li saloneke li Erxeniyê pêk hat, di gel Hevşaredara Şaredariya Bajarê Mezin Serra Bucak, Hevşaredarên Şaredariya Erxeniyê Bîrsen Azak Bayar û Şiyar Guldîken û hemwelatî beşdar bûn. Beriya konserê, der barê dîroka 8ê Adarê Roja Jinên Karker ên Cîhanê de agahî hat dayîn.

Hevşaredar Bucak, di çalakiyê de axivî û diyar kir ku jinên ku îro li vir kom bûne hevalên rêya hev in û got, "Çi dayikên me çi jî hevalên me, jinên ciwan, di têkoşîna jinan de, di têkoşîna rêxistinî ya jinan de, di têgihiştina me ya şaredariyê de, bi perspektîfa azadîxwaz a demokratîk a jinan, her yek ji me hevalên rêya hev in. Çak ku hûn hene, çak ku hûn li vir in".

'Em mîraseke girîng hildigirin'

Bucak destnîşan kir ku jin bi gelek pirsgirêkan re têdikoşin û wiha peyivî: "Dema ku em diçin 8ê Adareke din, mixabin hem li welatê me hem li bajarê me hem jî li Erxeniyê ku yek ji mezintirîn navçeyên me ye, em rastî rastiyekê tên ku em di vê civakê de, ji ber ku jin in, bi gelek pirsgirêkan re têdikoşin. Bêguman em mîraseke girîng a têkoşîna dijî van pirsgirêkan, serkeftina li hember van pirsgirêkan, têkoşîna rêxistinî ya jinan a derxistina hebûna jinan hildigirin".

Hevşaredar Bucak diyar kir ku di 8ê Adarê û 25ê Mijdarê de, ew bi jinan re xebatên li ser aliyên cuda yên tundiya li dijî jinan û di gelek qadên wekî xebata jinan û xizaniya jinê de dimeşînin.

'Em jinên ku xwedî ezmûneke girîng in'

Bucak anî ziman ku wekî jin, nêzî 20 salan e di rêveberiyên herêmî de xwedî ezmûneke girîng in û got, "Em vê ezmûna xwe ji ku digirin; em ji têkoşîna xwe ya rêxistinî ya jinan digirin. Îro siyaseta me ya azadîxwaz a jinan ku em di DEM Partiyê de dimeşînin, têgihiştina me ya rêveberiyên herêmî yên demokratîk û têkoşîna jinê ku em ji salên dirêj e ku ezmûn dikin, têkoşîna hebûna jinê, têkoşîna wekheviyê, hemû ev tişt pir bi qîmet in".

'Em ê têkoşînê ji duhî zêdetir mezin bikin'

Hevşaredar Bucak got ku dê xwedî li têkoşînê derkevin û wê ji duhî zêdetir mezin bikin û axaftina xwe wiha domand: "Em ê vê têkoşînê, bi xwedîderketina ji duhî zêdetir li xeta wekhevîxwaz û azadîxwaz bibin. Dîsa em tu sîstemekê ku di bajarê me de jinekê rastî tundiyê tê, ku tê de qetlîamên jinan hene, cudahiya jinan, marjînalîzekirina jinan heye, qebûl nakin. Di şûna vê de, em dixwazin sîstema xwe ya dadmend, wekhevîxwaz û jinê-azadîxwaz ava bikin. Dîsa di rêveberiyên herêmî de, em dixwazin bi xebatên 11 mehî yên hevşaredarên navçeyê û serokên daîreyên jin, têkoşîna jinan zêde bikin. Beşa herî girîng a têkoşîna me, em bang li hevalên jin ên ciwan dikin; hûn bibin subjeyên bingehîn ên perwerdehiyên midûriyetên jinan, xebatên hişmendiyê".

'Em ê bi hev re tundiyê rawestînin'

Hevşaredar Bucak bal kişand ku jin dixwazin tora tundiyê ya ku li derdora wan tê honandin bişkînin û got, "Em ê bi hev re tundiyê rawestînin, em ê bi hev re li kuçeyê, li qadê, li malê tundiyê rawestînin û her hevaleke jin dê bizanibe ku ew di vê qadê de ne tenê ye. Ev mijareke pir girîng e, divê her yek ji me bizanibe ku em ne tenê ne, li kêleka her yekî ji me hevalên wê, hevalên jin, hevalên jin ên ku em dikarin mil bi mil li kêleka hev bisekinin hene".

'Em 8ê Adarê pêşkêşî dayikên xwe bikin'

Hevşaredar Bucak, bal kişand ser girîngiya ziman û çandê û wiha got, "Em dibêjin ku em di vî welatî de, wekî hemwelatiyên wekhev û azad, bi ziman û çanda xwe hebin, wekî hemwelatiyên wekhev di destûrê de cih bigirin. Em bi nasnameya xwe, bi zimanê xwe, bi hebûna xwe yek bin, wekhev bin. Dayikên me jî tam kevirê bingehîn ê vê têkoşînê ne. Gelek tişt hene ku em ji mîrasa ku wan ji me re hiştine hîn bibin. Em vê 8ê Adarê pêşkêşî dayikên xwe bikin. Ez dixwazim ji ciwanan re jî bibêjim ku divê ew qîmeta vê mîrasê baş bizanibin. Tenê wekî nifşê ku dîrokê baş dizane, em dikarin xwedî li dîrok û paşeroja xwe derkevin. Di herêman de, li kuçeyan, li malan, zêdekirina hejmara navendên piştgiriya jinan, di hemû qadên ku em dikarin pirsgirêkên taybet ên bajêr nîqaş bikin û em ê hişmendiya jinê zêdetir bixin, roleke pir mezin dikeve ser rêveberiyên me yên herêmî. Divê em bêyî ku bisekinin, bêyî ku demê winda bikin, her qadê bikin qada jinê".

Hevşaredar Bucak diyar kir ku heke xwedî li têkoşînê dernekevin, dê di rêveberiyên herêmî de bi têgihiştineke mêrî, yekdeng re rû bi rû bimînin û divê têkoşîn neqede.

Hevşaredara Şaredariya Erxeniyê Bîrsen Azak Bayar jî, 8ê Adarê Roja Jinan a Cîhanê ya jinan pîroz kir û behsa girîngiya piştgiriya jinan kir.

Piştî axaftinan, hunermend Ayfer Duzdaş derket ser dikê û kêlîkên xweş bi beşdaran re derbas kir.