Şaredariya Bajarê Mezin a Amedê, bi zêdekirina hejmara ekîban, beriya meha Remezanê ji bo parastina tenduristiya gel dest bi kontrolên xwarinê kir.

Ekîbên girêdayî Serokatiya Daîreya Karûbarên Tenduristiyê û Serokatiya Daîreya Zabitayê, beriya meha Remezanê li cihên kar ên wek xwaringeh, şîrînayîfiroş û kargehên hilberînê ku rasterast girêdayî tenduristiya gel in, dest bi kontrolên xwarinê kir.

Ekîbên ku piştî perwerdeyên di bin banê Koordînasyona Kontrola Xwarinê de dest bi karên xwe kirin, dê di dirêjahiya meha Remezanê de, li 17 navçeyan bi taybetî li navenda bajêr kontrolan bidomînin.

'Me ji bo meha Remezanê 4 ekîbên zêde ava kirin'

Serokê Daîreya Zabitayê Veysî Ruzgar, der barê xebatên ku tên kirin de agahî da û diyar kir ku bi lêzêdekirina 4 ekîbên din li ser ekîbên heyî, dê di dirêjahiya meha Remezanê de ji bo parastina tenduristiya gel karên xwe bidomînin. Ruzgar got: "Îro, bi encama biryara ku me di Desteya Koordînasyona Parêzgehê de girt, me ji bo meha Remezanê 4 ekîbên zêde li ser ekîbên me yên kontrola xwarinê yên li navçeyên navendî ava kirin. Piştî ku me perwerdeyên pêwîst dan van ekîbên zêde, me îro kontrola xwe ya yekem pêk anî. Di meha Remezanê de dê bi taybetî sepanên me yên li ser kontrola xwarinê, kargehên ku hilberîna xwarinê dikin û kargehên mîna şîrînayî û pastayan bidomin."

'Armanca me ew e ku bi sifir pirsgirêk xizmetê bidin gel'

Ruzgar, diyar kir ku dê bi ruhê seferberiyê ekîbên kontrola û sehkirina xwarinê ava bikin û got ku dê li navçeyên gundan jî bi ekîbên zabitayê, personelên tenduristî û xwarinê yên li navçeyan re li seranserê parêzgehê ekîbên kontrola xwarinê ava bikin. Ruzgar wiha axivî: "Ekîbên me yên berdewam hebûn lê ji bo meha Remezanê me ekîbên zêde li ser van ekîban ava kirin. Armanca me ew e ku di bûyerên pêşkêşkirina xwarinê de bi sifir pirsgirêk xizmetê bidin gel. Herî kêm ji aliyê kontrolê ve, erkên ku dikevin ser milê me baştir bi cih bînin."

'Em ê çareseriyên lezgîn ji giliyên welatiyên biafirînin'

Ruzgar, daxwaz kir ku welatî li hember kontrolên xwarinê hestiyar bin û got ku ger rewşên neyînî yên ku dikarin çêbibin ji rêya ALO 153 û xeta îxbara Whatsappê ji wan re bên şandin, dê bikaribin çareseriyên lezgîntir biafirînin.