Hevserokên Şaredariya Bajarê Mezin a Amedê Serra Bucak û Dogan Hatun, beşdarî pîrozbahiya Newrozê ya li navçeya Baglarê bûn û Newroza gel pîroz kirin.

Li Parka Newrozê ya li navçeya Baglarê, ji aliyê Partiya Wekhevî û Demokrasiya Gelan (DEM Partî) ve pîrozbahiya Newrozê hat lidarxistin. Di pîrozkirinê de, bi Hevserokên Şaredariya Bajarê Mezin Serra Bucak û Dogan Hatun re, nûnerên partiyên siyasî û rêxistinên civaka sivîl û hemwelatî beşdar bûn.

Hevserok Bucak: Amed bajarê aştiyê ye

Hevserok Bucak û Hatun, derketin ser dikê û silav li gel kirin. Hevserok Bucak di bernameya axaftinê de, bi gotina 'hûn bi xêr hatin' ji beşdaran re got, "Ey gelê Amedê, Dayikên Aştiyê, jinên têkoşer; hûn baş dizanin ku bajarê Amedê bajarê aştiyê ye, bajarê wekheviyê ye, bajarê azadiyê ye, û bajarê hêviyê ye. Ev îrade, îradeya aştî, wekhevî û azadiyê ye. Ev îrade dê aştiyê bîne ji gelên Tirkiyeyê re. Em di pêvajoyeke girîng de ne. Ev pêvajoya civaka demokratîk a nû, berhema xebata we ye. Gelê me yê hêja, ez bi hezkirin we hemûyan hembêz dikim. Newroza we pîroz be."

Pîrozbahiya Newrozê, piştî axaftinan bi pêxistina agirê Newrozê dewam kir.