Hevşaredarên Bajarê Mezin ê Amedê Serra Bucak û Emîn Ay, piştî Kongreya 3emîn a Awarte ya Partiya Wekhevî û Demokrasiyê ya Gelan (DEM Partî) ya Amedê, serdana Fatime Îzol Levent û Yunus Muratakan ên ku ji bo Hevşaredariya Bajêr a Amedê hatibûn hilbijartin kirin û pîrozbahî li wan kirin.

Di serdanê de ku li avahiya Serokatiya Bajêr a DEM Partiyê de pêk hat, li ser xebatên bajêr û çalakiyên di warê rêveberiyên herêmî de nêrîn hatin guhertin. Hevşaredaran di serdanê de serketin ji rêveberiya nû re xwestin û peyama yekîtî û piştevaniyê dan.

Hevşaredar Bucak: Diyar e ku em ê bi hev re bimeşin û gelek karên pir çêtir bikin

Hevşaredar Serra Bucak di serdanê de pêvajoya kongreyê û armancên ji bo dema pêş de nirxand. Hevşaredar Bucak di axaftina xwe de ev tişt anîn ziman:

“Me xwest em hevalên xwe ziyaret bikin, serketinê yek bi yek ji hemû hevalên xwe re bixwazin. Kongreyeke xweş bû. Destê hemûyan sax be. Ango ji amadekariya kongreyê jî diyar e ku ev rêveberiya nû dê bi heman kelecanê, bi heman amadebûnê xebatên xwe bidomîne û ji duh ve em ê bi hev re li bin gelek karên pir çêtir îmze biavêjin. Bi rastî jî kongreyeke pir serketî, bi coş û xweş bû. Tevlêbûna wê xweş bû, axaftinên wê xweş bû. Bê guman dema em vê dikin, em ji dil spasiyê ji rêveberiya xwe ya berê re dikin. Bê guman ji rêveberiya me ya berê jî hevalên ku di vê rêveberiyê de dewam dikin hene. Em ji wan re jî di çarçoveya dema nû de serketinê dixwazin.”

‘Pêşvebirina rêxistinbûnê bi qîmet e’

Hevşaredar Bucak bi bîr xist ku di warê siyaseta Tirkiyê de bi salan e pêvajoyên dijwar tên jiyîn û bal kişand ser pêvajoya aştî û demokratîkbûnê. Hevşaredar Bucak her wiha da xuyakirin ku veguherandina atmosfera ku berdewam dike bo tevgerekê û herikîneke erênî, her wiha pêşvebirina rêxistinbûnê pir bi qîmet e.

Hevşaredar Ay: Em ê têkoşîna xwe bidomînin da ku jiyana demokratîk raçînin

Hevşaredar Emîn Ay jî destnîşan kir ku bawerî û hêviyên wan bilind in û anî ziman ku pêvajoya civaka demokratîk û aştiyê dê bi rengekî koordînekirî ligel rêveberiyên herêmî û saziyên din bimeşe û dê hêzê bide xebatan. Hevşaredar Ay bal kişand ser girîngiya pêvajoya ku em tê de ne û destnîşan kir ku ew ê hemû xebatan bi armanca raçandina jiyana demokratîk bidomînin.

Piştî axaftinan, Fatime Îzol Levent û Yunus Muratakan jî kêfxweşiya xwe ya ji ber serdanê anîn ziman û spasiya Hevşaredar Serra Bucak û Emîn Ay kirin.

‘Em ne tenê ne, em ê piştevaniyê bidin hev’

Fatime Îzol diyar kir ku ji roja destpêkirina wezîfeya xwe ve ew ji serdanên hem gel û hem jî saziyan kêfxweş in û got:

“Em ne tenê ne, gava em piştgiriya hev bikin em ê hemû astengiyên li pêşiya xwe rakin; tê xuyakirin ku dê wisa jî bibe. Bila zimanekî xweş û xebateke xweş hebe ku em bi rengekî piştevaniya hev bikin û bi domdarî di nava têkiliyê de bin.”

‘Piştgiriya we ji bo me pir girîng e’

Hevşaredarê Bajêr ê DEM Partiyê yê Amedê Yunus Muratakan jî got:

“Bila em ji hev agahdar bin, hêzê bidin hev; serdana we em kêfxweş kirin, ez spasiya we hemûyan dikim. Di xebatên xwe de em ji xwe di nava têkiliyê de ne. Piştgiriya we ji bo me pir girîng e, ser seran ser çavan hatin.”

Di serdanê de Hevberdevkên Meclisê yên BŞMyê Demet Ceylan û Ayhan Karatekin û endamên meclisê hevrêtî bi Hevşaredar Bucak û Ay re kirin.