Hevşaredarê Bajarê Mezin ê Mezin Emîn Ay, tevlî civîna aştiyê ya ku ji bo bidawîkirina dijminahiya di navbera malbatên Ozpinar û Kaya de hatibû lidarxistin, bû. Bernameya ku li salonekê ku li taxa Şehitlik a navçeya Yenişehirê hat lidarxistin, ji bilî Hevşaredarê Bajarê Mezin ê Amedê Emîn Ay, Hevserokên Bajarê Amedê yên Partiya DEM’ê Fatime Îzol Levent û Yunus Muratakan, Hevserokê Bajarê Amedê yê DBPê Ahmet Dogan, Dayikên Aştiyê, endamên meclîsa DBBê, hevşaredarên navçeyan, nûnerên rêxistinên civaka sivîl û gelek welatî beşdar bûn.

Hevşaredar Ay: Em ê di navbera hemû gel û baweriyan de aştiyê ava bikin

Di bernameyê de ku peyamên aştî, yekîtî û piştevaniyê hatin dayîn, Hevşaredarê Bajarê Mezin ê Amedê Emîn Ay spasiya kesên ku di pêkanîna aştiyê ya di navbera malbatan de ked dane kir û wiha got:

“Niha em di pêvajoya aştî û civaka demokratîk de ne. Em hêvî dikin ku em ê di navbera hemû gel û baweriyan de aştiyê ava bikin. Ji bo em bigihêjin vê armanca xwe, divê berî her tiştî pêşî em aştî û tifaqa xwe ya navxweyî pêk bînin. Ya ewil divê em di nava xwe de aştiyê û tifaqa demokratîk ava bikin. Rêya vê jî çi di navbera malbatan de çi di navbera eşîran de be, heke pirsgirêkek hebe, divê mirov wan bîne cem hev û bide lihevanînê. Tifaqa mezin bi tifaqên biçûk çêdibe. Ji ber vê yekê ev gav pir girîng û pir bi qîmet e.”

‘Aştî, nirxa hevpar a hemû mirovahiyê ye’

Hevşaredar Ay diyar kir ku wekî Şaredariya Bajarê Mezin eger rolek, misyonek û berpirsiyariyek ku bikeve ser milê wan hebe ew her dem amade ne û got:

“Aştî, nirxa hevpar a hemû mirovahiyê ye. Hemû dîn û bawerî jî aştî li ser mirovan ferz kirine. Di pêkhatina vê aştiyê de kê çi ked daye, destê her kesî sax be. Bila hezar caran mala wan ava be.”