Konservatuvara Bajêr a Aram Tîgran a ku di bin banê Serokatiya Daîreya Karên Çand, Huner û Civakî de xebatên xwe dimeşîne, ji ber serdema havînê di dawiya meha Hezîranê de navberê dide bernameyên xwe yên perwerdeyê yên ku di meha Îlonê de dest pê kiribûn.

310 ciwanan di serdema perwerdeyê de di çar beşên sereke de ji perwerdeya konservatuvarê sûd wergirt.

130 zarokên ku temenê wan di navbera 6 û 13 saliyê de ne, perwerdeya bingehîn a muzîkê wergirtin.

Konservatuvar dê di 29'ê Hezîranê de li Navenda Çand û Kongreyê ya Çand Amedê çalakiya dawiya salê li dar bixe.

440 xwendekaran ji konservatuvarê sûd wergirt

Berpirsê Konservatuvarê Ferhat Ertaş daxuyand ku bi serlêdanên serdema nû re dê di heft beşên cihê de perwerde bê dayîn. Ertaş destnîşan kir ku bi serlêdanên ku di meha Îlonê de hatine girtin re, perwerde hem ji bo zarokan hem jî ji bo mezinan hatine destpêkirin.

Ertaş da zanîn ku di sala yekem a perwerdeyê de ji bo mezinan di çar beşên sereke de (şano, sînema, muzîk û ziman û wêjeya kurdî) perwerde hatiye dayîn û di vê çarçoveyê de 310 ciwanan ji perwerdeya konservatuvarê sûd wergirtiye. Her wiha destnîşan kir ku ji bo 130 zarokên ku temenê wan di navbera 6 û 13 saliyê de ne jî perwerdeya bingehîn a muzîkê hatiye dayîn.

Di serdema nû de dê di heft beşên cihê de perwerde bê dayîn

Ertaş diyar kir ku di dawiya meha Hezîranê de dê navber bê dayîn perwerdeyan û eşkere kir ku di serdema nû de dê di van heft beşên jêrîn de xwendekar bên qebûlkirin:

Muzîk (Zarok û ciwan)

Şano

Sînema

Lîstikên gelêrî (Govend)

Ziman û wêjeya kurdî

Wêne

Anîmasyon

Armanc avakirina konservatuvareke di asta akademîk de ye

Ertaş anî ziman ku di meha Îlona sala 2026'an de serdema nû ya perwerdeyê dê dest pê bike û bal kişand ser wê yekê ku ew armanc dikin li Amedê di asta akademîk de konservatuvarekê ava bikin.

"Armanca me ew e ku wekî piştgirî bidin pisporbûna wan welatiyên ku dixwazin xwe di warên çand, huner û ziman de pêş bixin. Di heman demê de em armanc dikin hunermendên jêhatî yên ku dê berhemên mayînde ji paşerojê re bihêlin, perwerde bikin."

Ertaş diyar kir ku konservatuvar xebatên xwe bi tempoyeke bilind dimeşîne û li gotinên xwe zêde kir ku di serdema nû de dê bi bernameyên perwerdeyê yên berfirehtir xebatên xwe bidomînin.