"Têhetamayişê Turîzm, Medya, Senet û Kulturî" emser reya dîyine piştgirîyê Wezaretê Kultur û Tırîzmî pê mêmanîye Şaredarîya Bajarê Girdî ya Dîyarbekirî dest pê kerd.

Şaredarîya Bajarê Girdî ya Dîyarbekirî, muxabîrê kultur û senetî ya ke cîya-cîya bajaran de wezîfe kenî Dîyarbekir de kerd mêman.

Rojnameger û nuştoxanê ke çarçiwa "Têhetamayişê Turîzm, Medya, Senet û Kulturî" ameybi bajarî ma cayanê tarîxî gêrayî û derheqê nê cayan di agahî girewtê.

Gêrayîşî ra dima Serekê Komela Muxabîrê Kultur û Senetî Ibrahım Gokdemırî qalîkerdişêk viraşt û aşkera kerd ke ê wazenê her çar hetê Anadoliye bivînê û pê medya bidê şinasnayiş.

Gokdemîrî da zanayene ke piştgirîyê Wezaretê Turîzm û Kulturî ina xebat de zaf o. Gokdemırî qalîkerdişê xo de ewilî Walîyê Dîyarbekirî Munır Karalogluyî rê badê Şaredarîya Girdî rê spas kerd.

Serekê Dayîreyê Kultur û Karanê Sosyal ya Şaredarîya Girdî Alı Çelık zî têhetamayiş de qalîkerdişêk viraşt û wina vat: "Dîyarbekir hem hetê turîzmî hem zî hetê daşinasnayişî de en çîyê weş heq keno. Semedo ke Dîyarbekir endî pê çalakîyan bêro rojane welate ma zaf hadrekarîye ma estê. Ma şima ra zî wazenê ke çalakîyanê ke bajarî ma de yenê viraştiş, şima zî rojnameyê xo de ca bidê nê çalakîyan."

Qalîkerdişan ra dima Midurê Kultur û Turîzmî ya Bajarî Cemıl Alp derheqê erjeyê tarîxî û kulturî ya bajarî ma ser o pêşkeşêk viraşt.

Serekê Komela Muxabîrê Kultur û Senetî Ibrahım Gokdemır, plaketê spasîye Walî Munır Karalogluyî teqdîmê Serekê Dayîreyê Kultur û Karanê Sosyal ya Şaredarîya Girdî Alı Çelıkî kerd.

Pêynîya têhetamayiş de Şaredarîya Girdî rojnamegerê camêrd rê grewat, rojnamegerê cinîyan rê zî kefî vila kerd.