Hemşaredara Amedî ya Şaristanê Girdî Serra Bucak dîyar kerd ke seba starbîyayîşê feqêran ganî nîyadayîş û çareyêko bîn bêro awankerdene û wina dewam kerd; "Seba ke ma Amed de modelêk awan bikê, hem bawerî hem zî hêzê ma est o." Hemşaredar Dogan Hatunî zî va ke hemparê şaristanî şênê heme probleman safî bikê.

Hemşaredarê Amedî ya Şaristanê Girdî Serra Bucak û Dogan Hatun beşdarê kombîyayîşê DÎTAM'î bîyî ke Otela Mîtannîa de bi babeta "Amed, xîzmetê herêmkî û aqilo hempar" ameybî organîzekerdene. Hemşaredaranê ma Serra Bucak û Dogan Hatunî ra teber hemşaredarê qezayan û temsîlkarê rêxistinanê sivîlan zî beşdarê kombîyayîşî bîyî. Kombîyayîşî de derheqê Planê Stratejîk yê 5 serran de pêşnîyaz û waştişî ameyî vatene.

Hemşaredare Bucak:Ma do hema bêrê têhet

Hemşaredara Amedî ya Şaristanê Girdî Serra Bucak kombîyayîşî de qisey kerd û bale ante zehmetiyanê nê 5 serran ke do xizmetê şarî bikê û ard vîrardiş ke 8 serran de qeyyûman şaristanî rê zaf zerar dayo. Bucak wina dewam kerd; "5 serrîyê ke vernîya ma de yê, nê têhetameyîşê ma do bibê parçeyêkê karê ma. Mekanîzmaya ke ma sevkê xebatan bika ha tîya de ya, baş o ke şima est ê. Nê warî de ma xo hîna biqewet hîs kenê. Ma do dewam bikê ke bêrê têhet."

'Planê ma yê stratejikî est ê'

Bucak bi persanê; "Amed çîyan vindî keno?  Şarî rê çiyandano vindîkerdiş? yî dewam kerd û nê çîyî vatî; "Nê pêşkêşîyê ewroyinî de çîyo ke ame fehm kerdene o yo ke çîyê ke vajîyayî ganî ma bi hewayêko cîddî ser o vinderê. Pêro rasterast ma eleqedar kenê. Nê 3 û nêm aşmsnê peyênan de ma xeylê reyî temsîkaranê rêxistinanê sivîlan reyde ameyî têhet. Grûbanê fokusan de, planê stratejik yê 5 serran de ma ameyî têhet. Babatanê sey; derûdor, res, cinî, ciwan, astengdarî, awanîyê qaçaxî, binawanî, şaristanê zîrekî, awanîyê sosyalî, awanîyê xirabeyî, erdlerz, afete, û tiryakî de planê ma est ê. Tayê xebatê ma dest pêkerd û ma do sey rayberîyê herêmkî vernîya nê xebatan akerê û teşvîk bikê. Coka, ganî ma muhîmîya rayberîyanê herêmkî her demî ra zafêr nika fehm bikê."

'Hewcedarîya şaristanî bi revîzyonî est a'

Bucak îlawe kerd ke şaristan hem hetê fîzîkî hem zî hetê nifûsî ra gird beno û ard ziwan ke şaristanê bi zîhnîyetê qeyyûman ê ranthesî ameyo dîzanykerdene coka xeylê problemî vejîyenê. Nê 5 serran de bi şaredarîyanê xo yê qezayan do îmarêko newe biafirnê. Bucak wina dewam kerd; "Seba ney ma odayan û rêxistinanê sivîlan reyde tim yenê têhet û qîmet danê nî têhetameyîşî. Hewcedarîya şaristanê ma bi revîzyonî est a."

 'Ma cehd bikê ke Sûr reyna bibo cayê ciwîyayîşî'

Bucak ard vîrardene ke UNESCO'yî Sûrê Amedî girewtî lîsteyê Mîrasê Kulturî yê Dinya û bale ante zerardayîşê Sûr û Baxçeyê Hewselî. Bucak dîyar kerd ke Sûrê Amedî û Baxçeyê Hewselî tay mendo ke lîsteya Mîrasê Kultûrî yê Dinya ra bivejîyê û nê. 5 serran de karê înan ê tewr serekeyan ra yew o yo ke Sûrî reyna bikê cayê ciwîyayîşî."

'Ma şênê Amed de modelêk awan bikê'

Bucak îfade kerd ke ê seba starbîyayîşê feqêran çareyêko daîmî gêrenê û û nê çîyî vatî; "Qezaya ma Baglar de krîzê 'cayê xo de newekerdiş'î est ê. Baglar, Şehîtlîk, Huzurevlerî û fîskaya de erdlerzî ra dima ê krîzî ke qewmîyayî, sey xo mîyanê şaristanî de mende yê. Hewce keno ke ma seba problemê starbîyayîşê feqêran çareyêko bîn û newe peyda bikê. Ez tîya venga herkesî dana. Ma şênê Amed de modelêk awan bikê hem bawerî hem zî hêzê ma est o."

Hemşaredar Dogan Hatun: Amancê ma o yo ke ma problemanan safî bikê

Hemşaredar Hatunî dîyar kerd ke bi hemparanê şaristanî şênê heme problemanê şaristanî safî bikê û va; "Ma hêzê çareyî dî û zanê. Şarê ma û şaristanê ma bi emrê xo hezar serran êdî musayo ke pîya biciwîyo, probleman rê çare bivîno. Ma zanê ke problemanê şarê ma çi yo, demo ke vîyart, xeylê bi tahrîbatê ekonomîk û psîkolojîkan vîyart. La eke ma problemanan safî kerd, no problem zî zî safî beno. Amancê tena qedênayîşê deynan nîyo. Ma do problemanê nê şariştanî safî bikê. Eke problemî safî bibê do deyn zî biqedîyo. Ma do seba çareyî şêra her ca."

'Ma seba afetan merkezê koordînasyonî awan kerd'

Hemşaredar Hatunî dîyar kerd ke seba her tewir afetan merkezê koordînasyonî awan kerdo û wina dewam kerd "Ma do goreyê nê afetan plansazî û mîmarîya şaristanê xo bikê. Seba ke ma vera afetan mucadele bikê, ma do merkezêko gird awan bikê. Do tede her çî bibo heta îtfaît her beş tede hazir vindero û eke hewce biko, do bieşkîyo mudaxeleyê bajaranê cîranan zî biko."

'Seba Royê Dîcleyî xebatê ma est ê'

Dogan Hatunî ard ziwan ke Royê Dîcleyî hem bêtarîf hem zî bêstatu smeyo verdayene û va; "Seba ney planê ma est ê. Ney ra vanê; UNESCO "Raşteyê Payzajê Kulturî". No seba ma firsendê wayîr vejîyayîşî yo. Seba ney hewce keno ke xebatêka dîplomatîke ya zaf cîdî biba. Derûdorê Pirdê Des Çimeyî de xeylê kafeyî est ê, a herême îşxal kerdo. Nê problemî rê çareyêk lazim o."

'Wezaret ma reyde qisey nêkerd'

Dogan Hatunî ard vîrardene ke Wezaretê Derûdor û Bajarwanîye Murat Kurum vizêrî ameyî Amed û kombîyayîşê koordînasyonî kerd û wina dewam kerd; "Wezaretê Derûdor û Bajarwanîye ame şaristanê ma, ma waştêne ke ey reyde kombîyayîşêk bikê la o nêame hetê ma. Ey va, 'Ma do Fîskaya û Benûsenî birijnê" la çira awanîyanê xirban nêrijneno? La eke nê karî bidê şaredarîyan, ma şênê birijnê û emniyetê şarî xo zî bikê."

Kombîyayîş bi pers-cewaban qedîya.