Mudirîya Pêroyî ya DÎSKÎ yê Şaredarîya Amedî ya Bajarê Girdî di aşman de 15 hezar û 138 adresan de kontrolê awa şimitişî kerd û 955 adresî ke awa şimitişî seba amacêko bîn şuxulnayêne, tesbît kerdî. prosedurê qanunî tatbîq kerdî.

Mudirîya Pêroyî ya Îdareyê Awe û Kanalîzasyonê Amedî (DÎSKÎ), seba ke vernîya şuxulnayîşê awa şimitişî yê bêamanc bigîro, xebatanê xo dewam kena. Bajarî de bitaybetî aşmanê hamnanî de seba awdayîşê baxçeyî ra zaf zêde awe yena şuxulnayene. Ekîbê DÎSKÎ'yî, seba ke şarî zerarêk nêgîro, çimeyî hîna baş bêrê şuxulnayene û vernîya şuxulnayîşê awa bêamance bêro girewtene, xebatanê xo dewam kenê.

2 aşman de 15 hezar û 138 adresan de kontrol ame kerdene

Na çarçewa de 60 rojanê peyênan de, 15 hezar û 138 adresan de kontrolî ameyî kerdene, 955 adresî ke awa şimitişî seba amancêkê bînî şuxulnayêne, tesbît bîyî. Na babete de seba pawîtişê çimeyanê awe, şarî rê malumat ameyî dayene. 300 keye û cayê karî ke bêkontrol û bêsaete awe şuxulnayêne, tesbît bîyî û seba înan prosedurê abonebîyayîşî dest pêkerd.

141 sîteyan de şuxulnayîşê awa bêamac tesbît bî

Adresê ke kontrolî tede ameyî kerdene, tede 2 hezar û 100 sîteyî zî est ê. Ekîbanê DÎSKÎ'yî 141 sîteyan de şuxulnayîşê awa bêamance tesbît kerd. Ekîban, seba sîteyanê ke bîyê sebebê îsrafê awe, înan rê ceza ameye birnayene.

Kontrolî dewam kenê

Ekîbê DÎSKÎ'yî, cayê karî yê sey fabrîka, salona veyveyan, kafe, îstasyonê sotemenî û cayê sey deşt û baxçe de kontrolê xo yê şuxulnayîşê awa şimitişî yê bêamancî dewam kenê.

Şerîfoglu: Ganî şar awa şimitişî de hîna zaf dîqet bikero

Mudirê Pêroyî yê DÎSKÎ'yî Mehmet Şerîfoglu, şarî dawet kerd ke derheqê şuxulnayîşê awe de hîna zaf dîqet bikero û nê qalî vatî: "Şuxulnayîşê awa şimitişî û şuxulnayîşo bêamanc, awa ke yena şuxulnayene zêde keno û beno sebeb ke awe kêmî bimana û şar zerar bigîro. Na rewşe ke zafane aşmanê hamnanî de yena meydan, seba her kesî muhîm a ke şar awa şimitişî seba awdayîşî nêşuxulno. Bitaybetî ganî şarê dewan seba awdayîşê baxçeyan hîna zaf dîqet bikerê."